Les Pages Jèrriaises

Tchi ville dranmatique!

Saint Hélyi J'sis-t-i' à man tout seu à craithe qué Saint Pièrre Port n'est pon la pus belle ville des Îles d'la Manche? Jé n'sis pon tout à fait sans întéthêt dans la tchestchion, mais pouor dé mé Saint Hélyi m'pliaît mus qu'la capitale dé l'aut' Bailliage. Jé n'dithais pon qu'not' Ville est parfaite et j'sis tréjous à tâchi d'l'amender. Et nou n'dait pon exagéther: Saint Hélyi n'est ni l'Athènes du Ch'na ni Prague-sus-Mé. La Cohue n'est pon l'Palais d'Westminster d'Londres et la Rue d'Driéthe n'est pon les Clios d'Élysée d'Paris.

Tout coumme, j'dithais qu'Saint Pièrre Port pathaît mus quand nou l'vait d'la mé, d'à bord du baté par exempl'ye. Les maîsons et bâtisses accliutchis sus la raide côte font un bieau portrait, et les croch'noles et montées sont charmantes, mais v'là tchi vouos mate à monter et d'valer quand nou-s'est dans la Ville. Pouor dé mé, à Saint Pièrre Port nou-s'a des mangnifiques veues d'ilo l'travèrs du P'tit Ruau, mais i' n'y'a pon d'bouonnes veues au mitan d'la Ville coumme j'avons à Saint Hélyi.

Nou n'est pon bein atchilyi en arrivant à la Caûchie Lîzabé, auve l'architectuthe coumme des choutchets et des bliotchets du Quartchi du Hâvre. Épis la vielle ville est muchie au mitan d'la bolle dans tchi l'dêveloppement urbain a 'té vèrsé. Mais quand nou-s'est en Ville j'avons des pièches bein miyeuthes qu'nos couôsîns d'l'aut' bord. Lé Vièr Marchi est eune pièche plieine dé charme et d'caractéthe et d'histouaithe. La Pathade et la pièche du Cénotaphe offrent des veues vâliabl'yes (s'nou n'èrgarde pon trop la Maîson Cyril L'Mèrquand). Dans la Grand' Rue, nou peut admither l'Monument L'Sueux auve ses fontaines et les bouais, l'nouvieau pavage et l'café tchi soulait êt' eune p'tite maîson. Véthe, y'a ieu un grand amendement d'pis tout l'tchèrnage du trafi et d'la stâtion d'taxis. Et j'avons acouo les pièches modèrnes coumme Wests Centre et la Pièche d'la Libéthâtion et la Pièche du Bridge.

Mais quand nou-s'est dans la Rue Morier, y'a l'Centre Méthodiste d'un but, l'Marchi au mitan et la Chambre d's Êtats à l'aut' but, et coumme un giant, l'Mont d'la Ville - chu rotchi chap'ronneux. Tchi contraste qué nou vait! À la Pompe dé Haut, parmi les conmèrces et l'dém'nîn y'a d'un co eune falaise sauvage coumme un cro à gaffer l'tchoeu d'la Ville.

Assa, êt'-ous dé m'n avis, qu'Saint Hélyi est la ville la pus dranmatique des Îles d'la Manche?

Geraint Jennings


 

Viyiz étout:

 

Les Pages Jèrriaises