|
Les airangnis ch'nez pas d'qui rare,
Nou zen trouve à toutes les carres,
Niers, blianches, pilais, vlousais,
Mondoux partout l'yen a assais,
Long, court, p'tits, gros
Les môques nont pas d' erpos,
Y chuche le sang d'tout,
Bourdons, vêpres, môques à mi,
Toutes à lus goût,
Tout lancheon, macré;
Ah! mes pouors fréres de môques, ah! prennais m'navis,
Et n'allais pas hanté parmi les airangnis.
Chez de lais saloppris,
Que chez bêtes d'Airangniz;
Et les bêtes de chutte sorte
Une fais dans dans vot porte
Mène la vie la pus belle
Ove leus chiquette de telle,
Quil entasse en gros clius
Q'nou peut frumer l'hue,
Et une fais dans vos creux
Y crais tout à lieux
Ah! mes pouors fréres de môques, ah! prennais m'navis,
Et n'allais pas hanté parmi les airangnis.
Y casse
Y ramasse
Ils entasse
Et font un tiné,
En vos fliattant la pé,
Tandis que tout l'temps,
Y s'abreuvent de vot sang,
Si ou zête à lus gous
Damme chest fini pour vous
Car y dise q'la qués fait,
En pure charitai
Pour empêchi vot graisse
De v'nin trop épaisse
Ah! mes pouors fréres de môques, ah! prennais m'navis,
Et n'allais pas hanté parmi les airangnis.
Quand Satan se fait moine
Y paque ses mitaines
Ov les griffes minse en d'dans
D'une belle pare de gants,
Et fait le grand saint
Pour vos prendre en ses mains,
Et pis y s'erpaque
Dans sa vlousaie câsaque
Qués faites m'est avis
De telles d'Airangnis,
Car ou sent hardi l'sens
De chez pouors innocens
Ah! mes chiers frères de môques et prennais m'navis,
Et n'allais pas hanté parmi les airangnis.
LE BOURDON.
|
