Ch'tait au c'menchement du mais d'Mai, 1913.
Lé baté pilote Numétho 2, qu'est connu souos l'nom dé RIVAL, v'nait d'être ramênagi tout à neu et tout frais peint, conséquemment i' brillait comme lé yacht d'un grand milord.
L'êtchipe, qui d'ailleurs en sont les propriétaithes, en 'taient bein ordgilleux, et avec raison, et i' déciditent qu'i' s'sait bouon, devant qué dé c'menchi lus saison d'êté, d'inviter deux's-trais d'lus anmîns et d'faithe un "cruise" à St. Mâlo pour aller vaie les patates, et cétéra.
Nou-s-en pâlit longtemps, mais à la fîn lé jour fut fixé; ch'tait un jeudi matîn, et fallait sorti d'la cauchie à siex heuthes. Tout l'monde s'y trouvit, et nou n'peut pas dithe autrement, ch'tait des gens tout à fait distîndgis qui s'embèrtchîtent à bord dé chu baté-là.
I' y-avait je n'sai pas combein dé Cap'taines au long cours, un ex-Député ès Etats, un Président d'Club dé Tir, un membre dé Conmité d'Taxâtion, un Vîngt'nyi Militaithe, enfîn tout ch'qui y-avait dé pus haut pliaichi dans l'île.
Pour en dithe la véthité che n'tait quâsi pas prudent pour autant d'pèrsonnages împortants dé tchitter Jèrri dans l'méme temps.
A siez heuthes du matîn nou n'peut pas s'attendre à vaie fort dé monde sus la cauchie pour vos bailli un bouon "send-off", ch'est pourtchi ch'n'est pas êtonnant si nos mêssieux s'en fûtent sans qu'i' y-eusse autcheune démonstration.
Lé vent n'souffliait pas bein dû et chein qu'i' y-en avait était contraithe, ch'est pourtchi nou d'mandit à Jack si ch'est qu'i' savait à peu près à tchille heuthe qué nou-s-arriv'thait à St. Mâlo.
I' rêponnit qué si pouvait rondi la Bouie du Nord-vouét des Mîntchais à neuf heuthes, qu'i' d'vaient arriver là-bas à eune heuthe et d'mie ou deux heuthes dé l'arlévée. Fraînque, qu'était à la barre, sa pliaiche d'habitude, sé mînt à ritonner et dit: "Vaithe, ch'est SI. Si ma tante avait 'té un homme oulle éthait 'té m'n oncl'ye."
Quand vînt un temps lé vent mollit tout à fait et l'baté n'en faîthait pas du tout; la mathée l'entraînit un but dans l'seur-vouêt, et quand ou r'touônnit i' r'vînt sus ses pas, mais pas moyen d'vaie chutte célébre bouie dé tchi qu'i' fallait faithe lé tou. Nos mêssieux d'mandîtent ès pilotes si ch'est qu'ils 'taient seux qu'i' y-en avait ieune, ou p'têtre qu'ou s'en_'tait allée à la d'rive.
A mié la matinnée iun des Cap'taines au long cours qui n'avait pas mins l'pid sus un baté pour quatorze ans, c'menchit à blianchi atouo des babinnes; lé bieau temps, la belle couleu d'la mé, et la belle côte dé Jerri qui r'lîsait au solé, tout chenna céssit d'aver autchun întéthêt pour li, ch'est pourtchi i' d'vallit à bas dans la chambre et Jack li'aîdgit à s'mettre au liet. Bétôt nou ouï des soupirs et des gémissements (geints) et il 'tait bein êvident qué l'pouôrre Cap'taine était bein liain d'être à s'n aise. En d'vallant en bas, chein qui l'avait èrconsolé un mio était dé penser qu'i' s'en aller bein vite aver d'la compagnie car i' s'était apèrchu qué George pathaîssait aver la pépie étout li, mais les heuthes sé pâssaient et i' ouïyait la convèrsâtion sus l'pont et èrmèrtchit qué par bordées George avait autant d'becque comme autchun d's autres. Cap'taine né pouvait pas comprendre chenna et i' d'mandit à Jack: "Est-che qu'i' n's'en va pas être malade don, li?" Et l'autre lî dit: "Malade! v'là pus qu'eune heuthe et d'mie qu'i' n'fait qué d'dêgôsillonner par 'sus l'bord."
V'Là tchi pathut lî faithe un mio d'pliaîsi, mais au même instant i' ouï la vouaix à George qui criyit au chef "Reggie, apportes-mé eune boutelle dé biéthe!" Chenna l'dêgouôti tout à fait, et comme i' s'fît: "Bah! ou n'allez pas m'dithe que ch't homme-là est malade d'la mé, par exempl'ye!"
Eh bein, i' fûtent eune partie d'lus jour à éprouver à gângni jusqu'à chutte malheutheuse bouie et quand vînt un temps i' pouvaient justément la vaie à l'horizon, mais la mathée lés empêchit d'aller en faithe lé touo, ch'est pourtchi Fraînque sé décidit dé pâsser à travèrs des Mîntchais, dans l'pâssage entre la bouie et les Dêries Angliaises.
Je n'sai pas si j'dévthais publier des ségrets professionnels, mais en cas qu'ou vos trouvéthiez tchique bordée dans la même position, j'm'en vais vos donner les mèrs pour navidgi chu passage-là avec seûtheté. I' faut garder lé quatriéme rang d'patates dans l'grand clios à Fraînque Hâcou d'l'Êta, en lîngne avec la Corbiéthe et v'là tchi vos condit drait à travèrs.
A mié l'arlévée, i' c'menchîtent à vaie la côte dé France et à forche dé garder la beauprée pointée sus St. Mâlo i' parvîntent à y-arriver, mais la niet 'tait v'nue et les bouonnes gens qui les attendaient et qui s'étaient prépathés pour lus donner eune reception dîngne des traditions d'la ville, étaient v'nus à la fin à lus enn'yer et s'en 'taient allés lus couochi. Par lé temps qu'nos gens ancrîtent en d'dans du Môle il 'tait huit heuthes et d'mie du sé et i' fûtent oblyigis de rester là dans lus baté jusqu'à trais heuthes du matîn en attendant qu'les portes du bachîn ouvrîssent pour les laîssi entrer.
Dé vièrs deux heuthes la cône d'un grand 'steamer' qui pâssait tout près d'ieux les rêvilyi en sursaut et i' lus prépathîtent pour entrer dans l'bachîn souotre li. Eune fais en pliaiche nos bouonnes gens sé couochîtent pouor dé bouon et dormîtent paisibliément jusqu'à huit heuthes. I' fallit étre visités par la douanne, mais ch'tait rein qu'eune affaithe dé forme, car lés officièrs vîtent bein tout d'suite par les nobl'yes physionomies dé nos méssieux qu'ils 'taient bein liain d'être fraudeurs.
Lé p'tit RIVAL causit tout à fait eune sensâtion dans l'Port dé St. Mâlo par sén appathence chic et comme i' faut, et ch'tait des chents pèrsonnes qui l'admîthitent tandi qu'i' fut là.
Nou dêjeunit à bord et pis, auprès, nou tînt eune réception dé touos les grands fonctionnaithes qui voulîtent visiter nos mêssieux. Comme i' n'y-en vînt pon bein des pièches v'là tchi n'duthi pas longtemps, ch'est pourtchi i' s'en fûtent engagi eune vaituthe pour faithe eune touônnée dans les contrées à patates et pis aller mangi d's hitres à Cancale.
Lé jour sé pâssit sans autchun êvénement extraordinaithe, sinon qu'ils apprîntent que les patates craissent vite par-là.
Tandi qu'ils 'taient à en admither un bieau betchet qu'était quâsiment bouon à dêfoui, la femme à tchi il appartenait lus dit qué n'y-avait qu'siex s'maines qu'ils 'taient pliantées, Lé bouonhomme Joe, qui s'y r'connaît un mio, li rêponnit qu'i' n'avait pas d'peine à l'craithe, mais Ned, li, en êrachit deux's-trais pliantes et rapportit les patates en Jèrri pour les compather auve les siennes.
Ch'tait à l'Hôtel de l'Union qué nos mêssieux lus êtablyîtent duthant lus séjour, alors ch'tait là qui dînîtent quand i' fûtent èrvénus d'lus touônnée.
Mais lé brit avait couothu qu'ils 'taient à St. Mâlo et longtemps d'vant qui' fûssent finis d'dîner, l'hôtel c'menchit à emplyi d'monde qu'étaient v'nus pour les vaie; ch'tait pour la pus grand partie des familles jèrriaises qui sont êtablyies là-bas.
Auprès qu'ils eûtent êchangi des complyîments et qu'tout l'monde avait d'mandé des nouvelles dé ses gens en Jèrri lés uns voulîtent aller faiths un touo dans la ville, mais comme i' tchiyait d'la plyie eune partie d'ieux restîtent à l'hôtel a l'abri. Iun d'la dgaingue avait emporté un patchet d'cartes avec li, et i' l'trouvîtent bein c'mode, car v'là tchi lus bailli eune chance de passer la séthée à jouer à "Happy Families".
Ch'tait pour des pais d'Mai qui jouaient et quand i' fûtent finis d'lus gamme, George trouvait qu'il en avait pèrdu trente-chînq a san tout seu. Jack lî dit qu'il 'tait un menteux et i' n's'en fallit pas fort qu'i' n'y eûsse du brit, mais auprès qué l'caltchul avait 'tait fait comme i' faut, nou trouvit qué ch'tait George qui s'était trompé, car i' n'avait pèrdu qué trais pais d'Mai tout ensembl'ye.
Dé vièrs onze heuthes nou s'entre dit "à d'main" et les membres dé l'êtchipe s'en fûtent couochi à bord du baté.
Lé lend'main au matîn, nos mêssieux d'l'hôtel, dès qu'i' fûtent lévés s'en fûtent jusqué sus l'tchai pour vaie comment qu'tout allait, et i' n'trouvîtent qué trais hommes à bord, tous dans un divèrs êtat d'excitâtion et dé m'sespé. I' y'en avait iun qui mantchait. Pèrsonne né l'avait veu dépis huit heuthes du sé dé d'vant. Che fut eune constèrnation générale. Nou fouoillit l'baté d'un but à l'autre, nou r'gardit dans 'l'chain locker' et jusqué dans l'bathi à lard, mais partout ch'tait visage dé bouais.
En veue des tragédies qui lus sont tchiquefais dêroulées a St. Mâlo, nou s'înmaginnit les pus tèrribl'yes possibilités et nou pâlit même dé dradgi l'bachîn, quand tout d'un coup Reggie criyit "Here he comes!' Et ch'tait bein vrai, notre homme s'en v'nait avaû la cauchie, frais comme un pînchon, avec sa mackintosh et sa neuve castchette. Nou-s-éthait dit qué ch'tait un amitha ou bein un maître-d'port.
I' fallait d'explyicâtions à ch't heu, et i' lus racontit eune longue histouèthe comment qué, quand il 'tait à r'garder les boutiques i' s'était êdgéthé dans des c'mîns d'travèrs et avait compliètement pèrdu`ses 'bearings'. Il avait 'tait obliyigi dé d'mander âsile pour la niet à un vièr coupl'ye qui lî fûtent bein bouons et qui l'laîssîtes pâsser la niet dans lus grainyi. Il avait couochi tout seu là d'dans et y-avait happé eune suée d'fraid.
Touos l's autres ritonnaient dé oui tout ch'la, et pis i' s'entre dîsaient, auprès, qu'i' n'en criyaient pas un mot. Ch'est drôle tout d'même comme i' y-a des gens qui sont încrédules.
Auprès qu'nou-s-eut r'pathé tout à bord et mîns tout à la clié, nou-s-arrangit avec un batelyi dé garder s'n yi sus l'baté duthant la journée et cache, v'là nos messieux dans l'train pour aller pâsser l'jour à Dinan.
Pour lus d'senn'yer sus un té long viage i' r'fallit s'èrmettre ès "Happy Families". Joe et Harry né voulaient pas'y jouer, ieux, ch'est pourtchi i' r'gardaient la campangne à travèrs dé tchi qu'i' pâssaient et dé temps en temps faîsaient d'lus mus pour apaîsi les garçons quand i' y-avait appathence dé brit. Jack, li, viyait des pids d'pie dans touos les bouais et voulit s'amuser à les compter. Auprès qu'il en eut compté dans les sept chents, lés autres voulîtent y r'garder d'pus près pour vaie don, rêellement dé tch'est qui s'agissait, et pis, che n'tait pas des nids du tout, mais des touffes dé dgi!
La journée à Dinan fut bein agriabl'ye; nou visitit deux's-trais des pliaiches les pus întérêssantes et nou s'en r'vînt l'sé à St. Mâlo avec l'întention dé l'ver l'ancre pour Jèrri lé lendemain matîn, mais i' vînt à faithe un temps péthissabl'ye et quand nou s'entre tchittit l'sé ch'tait avec l'idée qu'il 'tait tout à fait probabl'ye qué nou n'stèrtéthait pon.
Monte Cristo, 1913
(modèrnîsé lé 25 dé Févri, 1969)
Viyiz étout: