Marie Hibou est diversement désappointée.
Le pus biau rêve de sa vie vaint justement de s'êffondrer.
Mais éttout ch'tait un bain drôle de rêve, pouor seur, comme vous allaient vaie.
Dépis tchique temps oulle avait prins un grand intéthêt dans les gâzettes qui nos arrivaient de Djernesi et je n'pouvais pas m'imaginer tch'est qu'oulle y trouvait de si interêssant.
Mais un biau jour je dêcouvri le "pot-aux-roses," quand j'adonni à la oui en grande conversation avec le Chef sus la tchestion du divorce.
Je sais bain que ch'est une affaithe de bain mauvais goût d'êcouter une conversation qui n'est pas intentionnée pour vos ouotheilles, mais j'eus la tchuthiosité de vouler saver tchie intethêt que Marie Hibou pouvait aver sus chute tchestion-là.
Et comme man nom fut mentionné deustrais fais duthant la conversation je pensi que j'étais parfaitement justifié de m'mettre ès êcoutes pour tâchi de dêcouvri de tch'est qu'i' s'agissait.
Et j'eus la surprinse de ma vie.
Craithious bain qu'ils 'taient à faithe un compliot pour prendre les m'suthes pour effectuer un divorce entre Marie et mé.
Le Chef li dit comme chenna: "L'affaithe est bain simplye. tout che qu'tu as à faithe est de prouver à la Cour qu'il a 'té coupablye de tchique infidélité ou bain de cruauté et la Cour vos s'pathetha à tout jamais."
"Tout ch'la est bain bon," se fit Marie, "mais ch'n'est pas aussi facile comme nou craithait bain. Quant à la cruauté, ou savez tous bain que j'ai passé des années minsethablyes avec li, mais je n'peux pas dithe qu'i' m'a 'té directement cruel, i' n' m'a jamais frappée, ch'a 'té généralement l'contraithe, j'ai capuchi d'sus bain des feis mé, quand i' m'a mins à but d'patienche, mais i' n' s'est jamais r'touané.
Sus la tchestion d'infidélité je s'sais prête à gagi qu'il en a 'té coupablye assez souvent, mais je n'peux pas fourni autchune preuve qui pouorrait satisfaithe un tribunal. Opprès chute bordée-là l'année passée quand i' fit sa matinée sus la grève à trillyi la piau d'une touriste qu'était brulée du solè, je pensi qu'il 'tait temps que je m'en otchupisse et je fis des dêmarches pour tâchi de l'happer mais je n'pus pas y rêussi."
"Mais," se fit l'Chef, "tch'est qu'i' va faithe à St. Malo, une feis ou deux par an? V'là tchi m'pathaît suspect!"
"Oh!" Marie raîponni, "j'étais de ch'tte idée-là ettou mé, et j'ai dêpensé une petite fortune en engageant un "private detective" pour le survillyi."
"Ah!" s'êcriyi l'Chef, "ch'tait une bouanne idée ch'la! chu limier-là dait t'aver donné des renseignements bain interêssants sus sa condite là-bas."
"Pas du tout! Ch'tait justement comme nou dit "des sous enviés d'hors." Tout ch'que l'Caouain faisait là-bas était d'aller rôder alentou du marchi à paisson, et pis il allait visiter la Cathédrale. Opprès chenna i' passait des heuthes assis sus la digue à r'garder les gens qu'étaient à s'bagner. Une feis i' fut jusqu'à Cancale mangi un fricot d'hîtres et v'là comment qu'i' passait san temps. L'homme que j'avais engagi ne put jamais l'attraper à faithe autchune chose hors de la vaie."
"Est-che qu'i' n'entrait jamais à "Charley's Bar?"
"Nennin, à ch'qui pathaît. Une feis il entri dans un café et c'mandi un cointreau et opprès qu'la hardelle l'eut servi ou s'assiévi à côté d'li et li dit comme chenna, "Eh bain, qu'est-ce que tu as à m'dire, mon petit chéri?"
Et là d'sus le Caouain se l'vi de d'sus l'banc et li raîponni, "Arrière de moi Satan!"
Et i' sorti sans seulement goûter sa consommation."
"Ah bain par exemplye!" le Chef s'êcriyi, en v'là iune qui va toute seule! Est-che que tu ès assez naive pour craithe ditèt niollin?"
"Eh bain," s'fit Marie, "i' faut que j'admette que j'esu d'la peine à avaler une patheille histouaithe, mais m'n embassadeur me certifyi qui ch'tait la pliaine et entchèthe véthité."
"Bah!" s'fit l'Chef, "i' sont d'par ensemblye. Il est probablye que l'caouain l'a rêcompensé pour te donner un bouan rapport et que ches deux ouaisiaux-là sont fait la noce avec tes sous."
Ah! si seulement que j'pouorrais m'asseuther que tel est l'cas! Mais enfin, je m'en vais persevether pour tâchi de collecter l'êvidence nécessaithe et je compte sus vous pour me garder au couothant d'autchune chose qui pouorrait s'arriver pour renforchi ma cause.
"Je n'y manquethai pas," se fit l'Chef, "mais comme Djernesi a décidé de n'pas passer une louai sus l'divorce j'ai grand peux que nos législateurs suivethont lus exemplye."
"Ch'est bain dêcouothageant," s'fit Marie, avec un profond soupir.
Je n'arrêti pas pour en oui pus long, mais j'dis à mé-même, "Caouain, tu sais à tchi t'en t'nin acheteu, mêfit-té!"
Caouain
Les Chroniques de Jersey 12/8/1933
Viyiz étout: