I' n'est pon tréjous mathée quand l'baté fliotte, mais i' pathaît qu'j'éthons un fliotchet d'batchieaux entre l'île et Saint-Mâlo ch't' année. La compangnie HD Ferries tch'a annonchi un nouvieau sèrvice pouor l'mais d'Mar s'en va rempliaichi l'Émeraude èrgrettée, épis y'étha eune traîsième compangnie, eune Française - Corsaire, tchi s'en va lanchi un lian mathitînme ch't Êté étout. Ch'est en tchi ches batchieaux sont coumme les beusses, nou-s'espéthe un sèrvice et n'en v'là trais tch'arrivent à la fais.
Véthe, chein qu'i' nos faut ch'est un sèrvice dé baté tch'est coumme un sèrvice dé beusse - rédgulyi, fiabl'ye et ordinnaithe. Nou n'peut pon c'mander l'temps mais ch'es'sait bein d'pouver plianner l'conmèrce, les fêtes et les vîsites sans aver à crouaîsi les dés dans l'espé qu'i' y'étha un baté en siêx mais d'ichîn, ou même démain.
Bein seu qu'tout chennechîn pâsse par la Brétangne et, si tout c'mîn mène à Rome, i' sembl'ye parfais qu'par siez nous tout c'mîn mène à Saint-Mâlo. Sans aver eune caûchie pouor les batchieaux à vaithuthes sus la Côte des Îles d'la Grand' Tèrre les lians mathitînmes né lus dêv'lopp'thont pon coumme i' dévthaient.
D'l'aut' bord d'la Dêroute, Granville né peut pon faithe la compétition auve Saint-Mâlo sans pouver atchilyi ches grands catamathans à vaithuthes. D'chu bord d'la Dêroute, eune chose tch'aîgu'thait hardi s'sait l'changement d'l'heuthe. Si j'avêmes l'heuthe continnentale, ch'es'sait pus aîsi auve les horaithes - et j'éthêmes les avantages des longues séthées pouor lé tourisme. Auve la même heuthe des deux bords d'la Dêroute, même sans la même heuthe des deux bords du Ch'na, les Jèrriais pouôrraient êcouter l's êmissions d'radio en Nouormand - et les cheins d'la Grand' Tèrre les progranmes en Jèrriais - à la bouonne heuthe.
Véthe, un miyeu sèrvice dé baté amend'da bein des choses, mais i' n'faut pon s'vanter d'sa mathée d'vant qu'ou n'sait faite!
Geraint Jennings
Viyiz étout: