La Brétangne (Bertègn en Gallo; Breizh en Bréton) est un pays tch'est un longis d'tèrre dans L'Nord-Vouêt d'la France. Ch'est un pays historiquement Celtique et la langue Brétonne est d'la même fanmil'ye qu'lé Gallouais et l'Cornouaillais. Lé Bréton est ieune des langues régionnales d'la Brétangne; l'aut' est l'Gallo tch'est eune langue Romane coumme lé Jèrriais.
Adminnistrativement, la région Brétangne încliut quat' départéments; lé chîntchième départément historiquement considéthé Bréton est încliu dans la région dite "Pays de Loire".
Pouor la fîn du quatrième siècl'ye auprès l'Christ, des gens Celtiques dé Galles et du Seur-Vouêt d'la Grande Brétangne lus êcantîdrent à crouaîsi lé Ch'na à seule fîn d'colonnîser l'tèrritouaithe tch'est achteu la Brétangne. L'avanche des Anglio-Saxons pus tard encouothageait acouo d'chutte êmîngrâtion. Duthant l'neuvième siècl'ye les Brétons fûdrent unnifiés en un rouoyaume. En l'an 867, les Brétons încorpouothîdrent les Îles d'la Manche dans lus rouoyaume. Mais l'avanche des Nouormands (des Vikings) m'nichit l'rouoyaume, et l'rouai des Brétons fit honmage au rouai d'France pouor lé souôtchein contré l'enn'mîn. Lé rouoyaume d'vînt un duché.
En 1491 l'héthitchiéthe au Duché, Anne, fut oblyigie dé s'mathier auve lé Rouai d'France, v'là tchi m'nit, auprès d'la dêrengliéthie dŷnnastique, à l'unnion formelle d'la Brétangne auve la France, votée par l'parlément Bréton en 1532.
Nou pâle dé deux parties d'la Brétangne: la Bâsse Brétangne (où'est qu'nou pâle traditionnellement lé Bréton) et la Haute Brétangne (où'est qu'nou pâle traditionnellement lé Gallo).
Au jour d'aniet la capitale d'la région est Rennes, mais historiquement d'aut's villes ont 'té faites sèrvi coumme capitale. Lé palais des ducs est à Nantes; lé parlément a siégi à Vannes; et en tout les rouais, ducs, et parléments ont r'mué l'tou du pays avaû l's années.
Nou mange des crêpes et d'la kouign-amann, et nou bait du cidre.
La couleu Brétonne est l'Blianc-et-Nièr. Coumme l'antienne nâtionnale nou chante eune vèrsion Brétonne dé l'antienne "Pays d'mes péthes". L'annima nâtionna est la blianche bélette.
Viyiz étout: