N'èrv'chîn les g'zettes et n'èrv'chîn l'or tchi lit;
les clios d'argent lithent - des êcrèdes d'paîsson.
Nou laîsse des lîncheurs dans l'creux du rotchi
en dêfrâlîndgant les cliôsées d'rions.
Des vèrtes êtînchelles lampent sus les brantchettes;
i' soûffl'ye des fôss'lées d'aûtchies d'vèrt enchens;
nou vait la vie tch'èrnait ès vliques et vettes;
nou ouait la boul'lie d'pièrres tchi plieuthe au vent.
Les palmes apitchies l'tou des grèves au dget
spartent lé manté êtrav'lé ès côtis,
ouaithe qu'les branques êpèrtchies saient dêcrouées.
"Pouortchi," qu'i' rouspètent "qu'tu nos a r'nonchi?"
Lé corps d'la campangne èrs'sa onguenné;
tout chein tchi sembliait mort r'étha la vie,
et toute la natuthe s'sa souôl'vée d'l'Hivé,
et des hardgieaux en blianc veindront nos qu'si.
Geraint Jennings
27/3/2015
| 