|
O doux Rnouvé, Que de jouissance Tu porte ov té A ta naissance. Qui belles couleurs, Qui belle verdure, Sans trop de chaleurs Sans trop de frédure. Tu-es la saison des amours Et tout par te se r'nouvelle, Tu nos donnes de bieaux jours, Tu couvres les bouais de fielles. Les cotils sont un drap d'or, A pllein nez nouz-y respire De parfums, un vrai trésor, Ch'est de qui qu'nou n'peut dêcrire. De touos côtès ch'est des flleurs Qui s'montrent l'une aupres l'autre; Y-en a de toutes couleurs Pour vot goût et pour le nôtre. De touos l's ouaisiaux nou ouait l'chant, Et chacun d'ieux a sa note, Du pus ptit jusqu'au pus grand, De la grive à la linotte. Aussi haut qu'ou peut monter S'en va chantant l'alouette, Mais quand ou veint se rposer De trop d'jouaie ou reste muette. Tantôt haut et tantôt bas Nou vait voler les hérondes; Devant que d'finir un rpas I font de diverses rondes. Pour se cauffer au solei La lêzarde se dêhalle; Du verpeu dans le fossé Nou vait betôt la lueu pale. Les ains n'sont pus engourdis Mais se mettent à butiner; Les papillons rêvillis Voltillent sembliant danser. Qui biau temps pour les promneurs A s'landrer le long des rues; Qui biau temps pour l's amouoreurs Une fais que la gniet est vnue. Le tui-tui et le coucou De bouanne heure s'font entendre, Et pus tard nou ouait étou La tourterelle si tendre. O doux Rnouvé Que ta naissance Apporte ov té De rêjouissance. Tu rends esperance, Soulage souffrance, Êpannis les coeurs Tout comme les flleurs. PL 6/5/1872 & 8/5/1872 |
Viyiz étout: