Les Pages Jèrriaises

Mes chants d'autfais

Air: The Harp that once

Mes chants d'autfais si rêvillis
Me font ach'-t-heu d'la peine;
Je sens trop bein que je m'vieillis,
Que ma fin est préchaine.
Les ouaisiaux qui dans le Rnouvé
Ont la vouaix si joyeuse,
Quand i sont saisis par l'Hivé
Ont la vouaix silencieuse.

La jeannesse r'semblle au Rnouvé,
Oulle est plleine de vie;
La vieilleche r'semblle à l'Hivé,
Oulle est tout engourdie.
I'n'faut pon s'gêner du lend'main,
V'la qui n'sert à personne;
I faut prendre l'temps comme I' veint,
Comme le bouan G'Dieu nos l'donne.

PL
6/3/1872

 

Viyiz étout:

 

Les Pages Jèrriaises