|
Iun des pus biaux dons faits à l'homme, Ch'est bein certainement la pomme: Peut-nou jamais veîr rein d'pus bé Qu'un pommi flleuri au r'nouvé? Ch'est un portrait de l'esperance, Un objet de reconnaissance Au chein qui parfeis pense un ptit, Et chaque chose approfondit. Et pis qu'est qui pouorrait dêcrire, Chein que pourtant chacun admire, Le bouais chergi du pus biau fruit Rouoge et jaune quand i'meurit, Et qui fait vnîn l'iaue à la bouoche, Que la pomme sait sure ou douoche; Qui-a toute sorte d'qualitès, Dont nou fait toute sorte d'mèts Que nou peut mangir cuite ou crue, Car ou n'fait pon la dêvoulue: Mais de tout l'bein que j'en ai dit, Che n'est oprès tout qu'la maintqi: Vere! ch'est une chose êtrange, Je n'ai fait qu'la maintqi d'sa louange. |
Viyiz étout: