Faites vot' chouaix
Mûsé d'Boeu - Caplyi - Gros Rom'thi - P'tit France - Tardi Rouoget
Hardi des variêtes dé pommes traditionelles dé Jèrri né sont pus dans l'île. Eune liste des pommes crûes pouor lé cidre, pouor mangi et pouor tchuithe à la fin du dgiêx-neuvième siècl'ye et au c'menchement du vingtième siecl'ye nos fournit auve un total dé 66 variêtés.
La prêsèrvation d'autant dé ches variêtés qué possibl'ye a 'té lé pâsse-temps et travas dé plusieurs gens, parmi ieux Brian Phillips et Rosemary Betts ou Don Huelin, membre dé la section dé la hortitchultuthe dé La Société Rouoyale dé l'Agritchultuthe et dé la Hortitchultuthe dé Jèrri tchi exhibite tréjous des pommes dé ses propres pommyièrs à l'exhibition du s'tembre dé la Société.
Pomme dé Brétangne - Têtard - Gros Pigeonnet - Belles Fil'yes
Ev'chîn eune liste, auve lus partitchularités s'lon la description du Docteu Frank Le Maistre, dé tchiques-eunes des variétés dé pommes crûes à la Fèrme des Etats (Howard Davis) et à Hamptonne:
- Rouoget: Tardi; su mais garde bein.
- Gros France: Grosse douoche pomme, vèrte. Eune bein bouonne pomme à tout faithe.
- Nièr Binet: Eune bouonne pomme à tout faithe. Fait d'be bouon cidre s'oulle est bein meûthe. Dézembre.
- Têtard: Pomme à cidre seulement. Pomme douoche amièrtie, vèrte. Dézembre.
- P'tit France: Pomme douoche dé mouoyenne grôsseu, duthe et hardi vèrte. Dézembre-Janvyi. Ieune des miyeu pommes tchi fait un cidre auve un goût tout spécial (et bouon à boutilyi) et garde bein.
- Gros Romeril (Gros Rom'thi): Douoche, molle vèrte pomme - la pus faillie connue ès faiseurs dé cidre. Ni couleu ni goût, lé fruit est pauvre en alcool et en tanin. Novembre.
- Douces Dames (Douoches Danmes): Bein douoches, heûsives. Lé cidre né s'garde pas bein auprès l'mais d'mar.
- Belles Filles (Belles Fil'yes): Heûsives, douoches et vèrtes. Bouonnes à tout faithe. Bouais porte bein.
- Museau d'Boeuf (Musé d'Boeu): Suthe, molle, rîlyie d'rouoge; bouonne pomme heûsive à tout faithe. Bouais porte bein.
- Museau d'Brébie (Musé d'Brébis): Douoches pommes amièrties, vèrtes et p'tites. Novembre. Font d'bouon cidre.
- Caplyi: Rîlyie d'rouoge. Octobre. Cidre dé bein bouon goût.
- Vèrt Caplyi: P'tite pomme, douoche amièrtie, vèrte grisâtre. Janvyi. Bouais porte bein.
- Gris Caplyi: Douoche, rouoge grisâtre, pétite pomme. Févri-Mar. Fait un bein bouon doux cidre auve un bouon goût. Lé bouais porte bein touos les deux ans.
- Côtard: Vert, su. Dézembre. Né fait pas un grand bouais mais porte bein.
Gros Rouoget - P'tit Rom'thi - Ballon - Douoches Danmes - Méthe du Mênage
Viyiz étout: