lé Nièr Beurre 
Au mais d'Octobre 1999, les Jannes Fèrmièrs fîtent du nièr beurre au Mangni des Près à Grouville. I' font lé nièr beurre châque année - ch'est ieune des activités d'lus clobe.
Chutte année, j'dêcidis d'les vîsiter et d'prendre des photos pouor les Pages Jèrriaises pouor mouontrer ès gens comme tchi qu'lé nièr beurre est fait.
Nou c'menche auve des satchies d'pommes et i' faut les p'ler. Assis sus des tchaîses dans la grange, jé p'lînmes les pommes et m'ttîtent les pommes p'lées dans un bathi qu'nou changeait quand j'lé remplyînmes.
Eune tinnée d'cidre pouor abreuver les travaillièrs aîgue lé travas.
La peile est un grand bachîn qu'nou met sus l'trépid au d'ssus du feu. Nou met lé cidre à bouoilli à seule fîn d'lé rêduithe. Pis, nou-s-ajouôte les pommes êtampées.
Il est partitchuliéthement înmportant dé r'muer tout l'temps lé nièr beurre dans la peile. Nou n'veurt pon qu'lé nièr beurre brûle. Pouor èrmuer lé nièr beurre, nou fait sèrvi un rabot. Ch'est eune manniéthe dé long râté tchi gratte lé fond d'la peile et touônne lé litchide bouoillant.
Lé rabot dait et' longue coumme eune vaule, pa'ce qué lé litchide crache en bouoillant, et ch'est dangétheux pouor lé chein tchi r'mue car i' pouôrrait s'brûler les bras et les mains.
Les hoummes font sèrvi lé rabot comme chennechîn: i' poussent et halent lé rabot en avant et en arriéthe tout en marchant d'un pas rhythmique à drouaite et pis à gauche. I' r'vont et r'veinnent, poussant et halant lé rabot. Ch'est un mio coumme eune êtrange danse hypnotique.
Dé temps en temps, i' faut ajouôter acouo d'pommes à la peile.
Nou r'mue et nou r'mue et nou r'mue....
Et nou met acouo des chouques sus l'feu étout.
Enfîn nou-s-ajouôte du rigolisse et pis du jus d'limons.
Nou-s-ajouôte les épices et pis l'chucre et nou r'mue pour acouo tchiques minnutes.
Lé nièr beurre est ach'teu prêt et les femmes lé mettent dans des pots à g'lée auve des tchulièrs en bouais. Nou met du papi sus et pis un couvèrt d'îndgienne.
Ichîn les femmes sont à coper les couvèrts d'îndgienne pouor les pots.
Et l'nièr beurre est finni!
Viyiz étout: