Les Pages Jèrriaises

La Grève dé Lé du temps passé

Quand au c'menchement dé ch't'année j'les vis en'train d'abattre l'hôtel ichîn haut à Iouville, tchi'tait maîson et boutique dévant ch'la, j'pensi à mé même, eh bein mes p'tits, j'nouos' n'allons vaie du changement par ichîn chutte fais!

Et sav'ous bein dans maîndre quat'sémaines tout'tait bas apliati comme eune galette, et tout èr'dréchi prêt pour creuser les nouvelles fondâtions pour souo-disant eune dgiêxaine dé maîsons.

Comme s'i'n'ch'tait pon assez d'vaie l'hôtel à Iouville 'tchaie qûasi d'un seul coup, eune affaithe dé deuse-trais s'maines auprès, la même chose s'arrivi au fond du mont, à la Grève de Lé - ch'tait l'tou au Pavillion!

Lé vièr Pavillion qu'avait'té déjà èr'bâti eune'fais - souotre lé feu tchi l'brûlli à tèrre i'y'a tchiques années à'ch't'heuthe, s'èr'trouvi assommer et abattu acouo'the eune aute'fais, mais chutte fais tout l'vièr machonnage ramonti l'mont en route j'crai bein, pour la Collette en ville.

S'inon i'faut dithe, pour lé mio d'bouais et d'vieillâgu'thie tchi fut d'brûler sus pièche. Ieu prèsqu'eune révolution là-bas chutte matînee-là. N'personne prîtent d'avis qué les vents'taient changis au Nord, et bein seux, eune vraie bliâse d'épaîsse feunmée ramonti la vallée pûtôt s'en'aller à l'ieau et étouffer deuse-trais vieil'yes mauves en passant.

Ch'tait pièthe qué quand l'Câté à Crabbé prînt feu en nénante-quatre. Dieu mèrcie les falaises élà ont bein èr'vèrdi et èr'prînt un mio d'couleu, mais i'r's'étha longtemps d'vant qu'nou'les èr'verra les falaises aussi jaune comme au'r'nouver dé l'année mil neuf chents chînquante-huit.

Lé geon tout bein flieuthit'tait comme dé l'or. J'man'r'souvins bein car j'prîns un coupl'ye d'portraits des deux bords, pour am'ner auve mé en Améthique ch't'année-la. Les falaises et la vieil'ye caûchie d'un bord et lé Câté et les falaises à Crabbé à l'est dé l'autre - la mé et l'ciel un parfait bliu.

Les deux buts d'caûchies'taient acouo d'but, la sienne dé d'houors tréjous la pus longue - auve la sienne d'en'd'dans la pus courte, quouai'qu'nou pouvez d'valler et ramonter si nou'n'tait pon trop lâsser, les grès en grannit. La pile dé pièrres toute e'trav'lée sus la grève souos les caûchies grandissait à m'suthe qué chaque grand'mathée et tempête avaler un n'aut' p'tit mio d'chutte vieil'ye et ancienne caûchie-là.

Dans l'temps nou's'a-veux tonnieaux comme tonnieaux d'sablion d'tchéthier dé d'ssus la grève là bas. J'i'r'pensi quand j'vis les chèrges dé sablion ramonter souotre lé vièr machonnage. N'pas dé d'ssus la grève, mais d'puchient et pelle'tée auve eune grand'machinne dé d'dans la banque dé sablion tchi'tait restée d'muchie parmi toute la vèrduthe en driéthe du vièr Pavillion, èrnommer lé "Fisherman's Wharf" à ches drein.

Chu sablion là, s'trouvi d'pousser là, quand l'terrain alentou d'la vieil'ye et ancienne Tour, fut dréchi pour lé tather dans l'temps qué'n'y'avait nulle part pour les touristes à laissi toutes lus vaituthes, tandiqu'i'taient à lus brun'nit au solé, alouong'nient sus la grève pus bas.

D'vant ch'la quand j'tais mousse chu tèrrain là alentou d'la vieil'ye Tour et d'l'aute bord dé la route'tait en mielle, tout sablionneux, où'est qu'lupin sauvage, geon et du potithon, i'craisser d'bouon tchoeu, eune fanmeuse pièche pour sé muchi.

Un mio pus haut lé long d'la route, où'est qu'l'ieau d'val sus san c'min pour la mé, lé bouon'homme Mess Prouten i'craissait deux p'tits betchets p'patates, eune affaithe dé pèrques, n'pas trop heûthi mais manniéthement sablionneux et soupl'ye.

Tout ch'la es houors et changi, mais eune chose i'reste - le p'tit becqu'ton d'tèrre mouoilli tchie'toucher; acouo'the plianter auve d'l'ôsyi - comme pour nouos faithe èr'penser et n'oublier pon lé temps pâssé, quand l'p'tit fèrmyi d'Jerri 'tait pêtcheux étout.


Portrait : La Grève dé Le du temps passé - auve les Bérrexes, la caûchie, la tour, les hôtels 'Pavilion Hôtel', 'Grève de Lecq Hotel' et 'Prince of Wales Hotel', et lé p'tit mont appelé La Charrière Huet ch'amène a La Heuniéthe (Crows Nest).

 

Ted Syvret
Dézembre 2000

 

Viyiz étout:

 

Les Pages Jèrriaises