Et i' l'dgettaient et envyîdrent des êpieurs tchi lus présentaient coumme des bouonnes gens, à seule fîn d'dêch'ler dé tchi dans ses patholes atout tchi i' pouôrraient l'trahi au pouver et à la jug'gie du gouvèrneux. Et i' lî d'mandîdrent, "Maît', j'savons bein qu'tu pâle et ensîngne chein tch'est juste et qu'tu n'èrgarde pon l's appathences d'eune pèrsonne mais qu'tu'ensîgne lé vrai c'mîn du Bouôn Dgieu: Ch'est en tchi nos est-i' alloué d'payi l's împots à César?"

Mais i' r'connut lus trique et lus dit, "Mouontrez-mé un dényi. Dé tchi qu'i' y'a l'portrait et l'nom sus?"

"Les cheins d'César," qu'i' dîdrent.

I' dit, "R'bailliz don à César touos les cheins tchi sont d'César, et au Bouôn Dgieu touos les cheins tchi sont d'Dgieu."

Et i' n'pûdrent rein dêch'ler dans ches patholes l'avant au monde, mais sa rêponse les êmèrvilyit et i' n'dîdrent mot.