Les Pages Jèrriaises

Frank Le Maistre: Tchiques patholes

Nou peut dithe sans hésitâtion qué Frank Lé Maistre 'tait un vrai Saint Ouennais - un gris ventre. Né lé 19 dé mai 1910 à Lecq il avait des réchinnes dans deux des vielles famnil'yes d'la paraisse, les Le Feuvre et les Lucas. Frank n'eut qu'un fréthe, Henri, qui mouothit i' y'a dêjà tchiques années.

I' pâssit la puspart dé s'n êcolage à Oxenford House à St Louothains, étant lé dernyi à êtudier là même après qué l'êcole avait freunmé. Tchittant Oxenford House, i' fut travaillyi dans la Rue des Trais Pigeons, connu aniet comme Hill Street, pour les Messieurs Lé Mâsuthi et Giffard.

Fraînque Lé Maistre En 1931, i' changit d'mêtchi et fut embauchi à la Ferme des Êtats où'est qui travaillit pour 25 ans. Avau l's années, i' prînt part dans l's êpreuves dé difféthentes récoltes, visitit les fermes partout l'île, prînt chèrge des dgaingues dé l'ouest comme contrôleur d'la graine dans l'temps d'la bat'tie duthant la dgèrre quand tout 'tait rationné et, après la dgèrre, i'jouit un immense rôle contre l'infestâtion du doryphore tch'envahit l'île.

À l'âge dé 46 ans il avait atchumulé eune énorme collection dé mots et d'phrases en jèrriais auve l'aigue dé Èrthu Balleine et l'encouothagement de san grand amîn George Lé Feuvre, George d'la Forge. Il avait bouonne ouothelle et avait fait note des divers ditons et expressions qu'il avait ouï en faîsant lé tou' d'l'île. En êffet, i' tait bein prépathé quand Lé Don Balleine l'învitit dé produithe un dictionnaithe d'la langue jèrriaise. I' c'menchit sa tàche en 1956 auve la dêtèrminâtion dé publier san chef d'oeuvre dgiez ans pus tard.

Frank avait La Ferme à Vinchelez et duthant l'jour i' travaillait dans les clios et ch'tait entré 5 et 8 heuthes du matîn et entré 6.30 et mînnièt qui mettait ensembl'ye lé matéthiel qu'il avait gliainé pour san dictionnaithe. Quand l'prix pour la publicâtion du dictionnaithe fut accepté l's împrînmeux décidîtent dé rencontrer l'êtchipe tch'avait produit lé livre. I' n'pouvaient pas craithe qu'un seul homme avait réussi à faithe dans dgiez ans chein qué 8 à 10 hommes éthaient normalement prîns siez ans à faithe. Et à la fîn ch'fut Frank tchi liut l's êpreuves deux fais à san tout seu.

En 1966 i'sé r'mînt à fèrmer pus séthieusement mais continuit à êcrithe - chutte fais aîdgant au Docteur Albert Carré auve lé vocabulaithe Anglyais-Jèrriais. Il' 'tait étout rédacteur du Bulletîn d'Quart d'An dé l'Assembliée d'Jèrriais; ch'avait 'té li parmi d'autres tch'avait 'té Membre Fondateur dé l'Assembliée en 1951.

Dé temps en temps, sans doute pour sé garder otchupé il êcrivait des poésies ou traduisait des cantiques. Il' 'tait hardi intérêssi étout dans la généalogie et mînt ensembl'ye touos les détails dé 42 fanmil'yes. Et pour eune septentaine d'années il avait r'cordé la plyie étant, après 60 ans, lé deuxième pus long à èrcorder dans la Grande Brétangne.

Fraînque Lé Maistre Après la publicâtion du dictionnaithe il èrchut eune mâsse dé lettres et i' correspondait rédgulièthement auve eune chentaine d'universités et d'académies. Sa contribution à la prêsérvâtion et la promôtion du jèrriais est sans égale et pour ses êfforts i' fut honoré par la Reine, par les Universités dé Caen et d'Uppsala et par lé Gouvernement Français et èrchut étout lé Prix Littéraire du Cotentin.

'Tchiques patholes' ... i'y'a tant qué j'pouorrais ajouôter.

J'ai mantchi d'mentionner jusqu'à ch't heu eune partie dé sa vie tchi 'tait bein importante pour li - sa famnil'ye. I' mathyit en 1936 Kathleen Amîn et i' taient parfaits parchonnièrs auve bein d's intéthêts en commun. Malheutheusement Kath mouothit i' y'a quatre ans et Frank a 'té chanceux d'aver l'support dé la préchaine généthâtion. Il 'tait péthe de Françouais, 'Douard et Jean, bieau-péthe dé ses belles fill'yes, papa dé 7 p'tits êfants et grand-grand-péthe dé 4. Ses couôsîns et ses amins li 'taient bein spécials et il appréciait hardi lus visites sustout dreinement quand il s'est trouvé oblyigi d'être en soin à Little Grove où'est qu'il a 'té si bein souongni.

Ch'est auve grand dêpiet qué j'disons à bétôt à un jèrriais si distîndgi.


Brian Vibert

JEP 30/8/2002

 

 

Viyiz étout:

 

Les Pages Jèrriaises