I' y'a quâthi autant d'manniéthes dé saluer et d'sé dithe bonjour tch'i' y'a d'peupl'yes et mêmes d'îndividus. Pouor dé mé, quand j'rencontre tchitchun j'dis d'amors tout bouonnement - "Salut!" D'autres, et y'en a parmi vous, chest seux, font sèrvi difféthentes expressions tchi veulent dithe à bein près la mème chôthe; mais, tchiquefais, tchi veulent dithe rein du tout! Car auprès tout ch'n'est qu'eune manniéthe qué nou happe dé ses pathents du temps d'ses ptits jours et, souvent quand nou salue telle et telle pèrsonne auve telles et telles patholes ch'n'est qu' par politesse et la preunmié chôthe tchi vouos veint sus l'but d'la langue. Souvent étout chein qu' nou dit n'est pon du tout chein qu' nou pense, ah mais, nan-dgia! Véthe, et pis y'a des sîngnes dé tête, des saluts auve la main, des sons divèrs, et cétéra.
Mais, comme dans tant d'aut's chôthes, tout ch'la a bein changi, et change tout l'temps. Par exempl'ye, combein souvent qu'nou vait un dgéthet l'ver san chapé aujour d'aniet? Hé, sans doute, i' y'a si p'tit d'chapieaux par les cmins à ch't' heuthe!
Dévant aller pus liain, dgia, né v'chin eune exempl'ye dé la politesse dé nouos vièrs. Un matîn, dans les 1914, lé Juge Vaudin (d'la P'tite Cour) crouaîthait L'Vièr Marchi, accompangni du Sieur George dé Gruchy Ahyi (Ahier) et l'Sieur George L'Feuvre, lé preunmyi étant Commis Greffyi et l'deûthième ("George d'La Forge" d'nouos jours) Commis Vicomte. I' rencontrîdrent lé ramonneux, du nom dé Channing, tchi lus l'vit san chapé. Lé Juge Vaudin èrtouërmit l'salut. Et, là-d'ssus, lé Sieur Ahyi fit la r'mèrque: "Ou l'vez vouot' chapé à un ramonneux, Moussieu?" Lé Juge èrpotchit tout d'siette: "Es'sa-t-i' janmais dit qu'un ramonneux est pus poli qu' mé?"!
En bein, prannons tchiques exempl'yes des salutâtions des gens d'cèrtains pays à l'êtrangi. Mais, n'faut pon penser qu' ch'est trop amûthant ou bête, qué ches couôteunmes; ch'est raide întérêssant, pûtôt. Et, quand nou-th-y pense, parmi nous, trop souvent les gens tchi font les pus bieaux saluts peuvent êt' des doubl'ye-faches. Ch'est en tchi, né rions pon trop entouor les manniéthes des gens d'aut's pays. Car parfais i' pouôrraient nouos ensîngni sus bein des sens.
Ah ça, les Arabes, ieux, s'entre-saluent comme chennechîn. Lé preunmyi tchi salue dit "Marche auve la paix!", et l'chein tch'est salué d'la manniéthe réponds, "Va auve tout ch' tch'est bouon!" Bouonne salutâtion, ma fîngre, i' faut avouer. En Abyssinnie nou prend la cravate du chein qu' nou salue et nou la met tout près sa bouoche, pis nou l'amathe à l'entou d'sa cheintuthe. Sans doute, lé chein tch'est' salué pouôrrait aîthiement prendre fraid tandi qu'l'homme poli et bein élevé s'rêcaûffe, si ché n'tait pon dans un pays caud! Eune manniéthe bein êtrange, n'est-che pon, tout d'même? Les Russes, ch'est à dithe cèrtains des Russes, car y'en a là en Russie comme des moûques et dé toutes les sortes - véthe, des chents difféthents peupl'yes - enfîn eune race dé ieux dé tchi j'ai ouï pâler, i' halent lus saûlés pouor saluer; un saûlé pouor les gens tchi sont du même rang comme sé; et deux saûlés pouor les gens tchi sont considéthés supérieurs. Eh bein, don, comme chenn'na si ch'est un parti qu' nou déteste nou peut l'saluer et lî fliantchi sa chavette à la tête 'en même temps ! Les Rouoges d'eune cèrtaine partie d'l'Améthique du Sud s'entre-soûffl'yent dans les nâthil'yes pouor faithe la beinv'nue. Pon trop c'mode quand il' ont du fraid, m'est avis! Les Lapons, d'la Laponie, frottent lus nez contre lé chein d'la pèrsonne tch'i' veulent saluer. Ch'la, pèrdingue, est eune raide bouonne manniéthe dé bailli toutes sortes d'catèrres étout les uns ès auts! Les natifs du Centre d'l'Afrique - du tèrme, d'eune cèrtaine partie du Centre dl'Afrique - lus flianquent à ventrillons. Pité ou pas, n'y'a pon d'soin, ch'est d'même!
Dans iun pays d'la Chinne, les gens vouos d'mandent "As-tu mangi tan riz?" Et nou rêpond "Oui mèrcie". Parmi les Grecs y'en a tchi vèrsent dé l'ieau sus lus tête pouor têmouongni lus respé envèrs les aut's. V'là tchi nouos pathaît drôle, à nous, pe'têt'. Mais, est-che pus drôle qu'un tas d' tchi qué j'faîthons? Dans l'Congo - v'là tch'a un aut' nom à ch't heu - en Afrique étout, les gens châquent dé main, ou pûtôt châquent dé dé, par lé dé du mitan. Les cheins tch'ont pèrdu l'maître dé font sèrvi l'préchain, il est probablye. Es Iles Philippinnes, ou pûtôt dans ieune des îles (car y'en a des chentaines, et nou-th-y pâle pus d'huiptante difféthentes langués!), nou prend l'pid du chein qu'nou rencontre et nou s'frotte la fache atout. Ha, il est d'mêtchi qu' ses pids n'sentent pon trop à sueu, ma fé! Dans L's Indes, à un bord ou, deux, quand i' s'entre-rencontrent iun êcopit dans la fache à l'aut et ch'tî-chîn èrtouônne lé complyîment! Ah mais, danme, ch'est la puthe véthité car lé chein tchi m'avait dit ch'la l'avait veu fait d'ses propres ièrs. Et ch'est prétendu bein malpoli d'êcopi à contre-tchoeu; faut s'y'adèrchi et tâchi d'faithe la chôthe comme i'faut. 'Presti d'mêtchi, chutte salutâtion-chîn en est eune sale, tout d'même ! Vaudrait mus, i' m'sembl'ye, ristchi à êt' malpoli et n'en faithe pon du tout. Ch'est r'pugnant et n'en v'là ieune, au mains, eune couôteunme, tch'est vraînment malaûc'seûthe!
En v'là p't-êt' assez, pouor mouontrer l's usagés dé tchiques aut's pays (pe't-êt' qué cèrtains ont dispathu par à ch't heu). Mais combein d'aut's, don, tch'i' dait y'aver dans touos les mille et mille pays du Monde! Touos les peupl'yes ont les leu et, bein seux, daivent compter qu' les cheins d'lus pays vaithîns sont drôles et êtranges.
Viyiz étout: