Ottawa, Ontario,
Cannada.
Lé 30 d'avri, 1977.
Moussieu l'Rédacteu,
En bein, sémnage, né v'la Moussieu l'Vicomte dé Jèrri vachi à ch't heu! Tch'est tch'éthait janmais pensé d'vaie d'ité? Et il en pathaît ordgilleux! San portrait est montré auve ses vaques dans la gâzette du 17 dé mar. I' dait y'en aver d'autres en Jèrri, des vachièrs, mais nou n'en ouait pon pâler ches jours. J'm'èrsouveins du temps tch'i' y'en avait iun dans quâsi toutes les fèrmes et tch'i' souangnait d'san troupé comme si ch'tait ses êfants. I' pâssait les nyits auve ses vaques quand il' 'taient malades. I' les connaîssait toutes par lus noms. I' gardait s'n yi d'ssus nou peut dithe niet et jour et quand l'troupé 'tait assez nombreux i' pâssait tout san temps à en souangni. I' fallait sans doute les m'ner à la tèrrée et les r'muer deux fais par jour et les traithe. Et j'vouos pâle du temps qu' nou triyait à la main.
En pâlant d'traithe, quand j'tais au Kenya en Afrique, en visite siez l'Mâjeur Arthur Maitland Le Feuvre, dé l'Armée du Salut, y'avait eune chentaine dé vaques à traithe touos les sièrs sus la fèrme d'l'Armée. Il' 'taient assembliées par lus vachi en chef dans un enclios tch'avait sept ou huit machinnes à traithe rangies d'un but. Lé vachi sé m'ttait à la tête des machinnes, et à m'suthe qué ieune 'tait libre il appelait eune vaque par san nom et ou s'dêmêlait d'parmi les chent vaques assembliées là et s'en v'nait à la machinne pour êt' traite. Lé vachi gardait un r'cord du montant d'lait qué châque vaque donnait. Ch'tait merveilleux d'vaie chent vaques rêpondre à lus nom ieune à la fais. Si jé n'l'avais pon veu d'mes propres s-ièrs jé n'l'éthais probabliément pon creu. Et ch'tait merveilleux, étout, qué l'vachi sé r'souvenait des chent noms des vaques. Il 'tait Afritchain. Les vaques 'taient des Friesians à l'exception d'eune douzaine dé Jèrriaises qué l'Mâjeur Le Feuvre gardait dans l'troupé pour enrichi l'lait. Y'en avait eune chentaine à sé autrément qu' les chent tchi donnaient pour lé moment, et l'ambition d'l' Armée du Salut 'tait d'apprendre ès Afritchains comment êl'ver et souangni des vaques et en aver ieune ieux-mèmes en fîn d'compte pour les bésoins d'lus fanmil'yes.
Mais r'vénant ès vaques en Jèrri. Où'est tch'est l'temps qu' nou-s-en viyait dans toutes les fèrmes? Dans chu temps-là, vachi ou domestique d'meuthait sus la fèrme et 'tait en chèrge dé san troupé sept jours la s'maine. Et pis l'temps vînt qué l'vachi avait san Dînmanche et qué l'maître souangnait des vaques li-mème chu jour-là. Combein d'fais qu' j'ai veu l'Connêtabl'ye (pus tard Juge) Francis Le Boutilyi à chutte tâche-là à Highfield à St. Ouën au Dînmanche matîn, et' i' pathaîssait absolûment heutheux d'san sort. Ch'tait un pliaîsi d'vaie la proprété d'ses êtabl'yes. Il avait pourtant tout pliein d'aut' choses à faithe, étant à la tête d'un tas d'fonctions publiques. Mais l'temps vînt qué les fèrmièrs né pouvaient pus trouver d'vachièrs, viyant qu' les gens n'voulaient pon travailli pus qu' huit heuthes par jour, et s'i' voulaient garder des vaques ch'tait eune affaithe dé travailli quâsi niet et jour sept jours la s'maine. Ch'est en tchi la vaque a presque dispathu d'la p'tite fèrme.
Heutheusement, j'avons acouo des vaques en Jèrri maugré l'changement d'scène et d'vie qué l'tourisme a apporté à l'Île et heutheusement qué nouos autorités ont ieu l'couothage et la sagesse dé s'èrbînfrer contre la tentâtion d'êprouver à agrandi nouot' belle pétite Jèrriaise en faisant v'nîn eune race dé vaques pus grandes et êtrangiéthes. J'tais content d'vaie dans la gâzette qué j'sommes acouo sus l'bouan bord dé chu côté-là pour un aut' chînq ans. Et v'la tchi m'ramémouaithe qué quâsi touos l's Améthitchains ont ouï pâler d'la vaque Jèrriaise mais pon d'l'Île dé Jèrri. Ch'est încriyab'le, mais ch'est d'mème!
I' faut espéther qué Moussieu l'Vicomte né s'en va pon s'enn'yer d'sa nouvelle tâche dé vachi à la fèrme dé Woodlands à St. Pièrre. Heutheusement pour li, Moussieu l'Connêtabl'ye L'Mèrquand, bouan fèrmyi li-mème, est seux d'lî donner un coup d'main et lî montrer comment s'y prendre. Et à ch't heu qu' j'avons un moussieu du calibre du Vicomte en chèrge d'un grand troupé d'mème, lé prix du lait s'en va p't-êt' bein d'valer à la pliaiche dé renchiéthi!
George d'La Forge
Viyiz étout: