Les Pages Jèrriaises

Les Jèrriaises

 

Eune vaque Jèrriaise

Y'en a partout, dé ches p'tites Jèrriaises. Nou n'peut aller n'importe iou sans en rencontrer. Et qu'i' sont belles ! Dans les campangnes d'Angyéterre y'a des Jèrriaises, ou des quâsi-Jèrriaises. Y'en a tchiques douzaines en Êcosse, et d'autres s'en sont allées en Irlande, sans saver trop pourtchi. I' sont au Canada un mio partout et n'importe ion qu'nou r'garde ès Etats Unis tchique Jèrriaise est seûse d'vos donner un clyin d'yi.

Allez en Australie, et les Jèrriaises sont là. Ch'est la même chose en Nouvelle Zélande. I' sont en Afrique, ès Indes, au Sud d'l'Améthique. Partout où'est qu'les Jèrriaises vont i' trouvent des hommes pour les aimer, et jamais i' ne r'veinnent vaie lus chier Jèrri.

Hein ? Tch'est qui pasle dé filles ou d'femmes ? Les hommes les r'gardent bein siez ieux, sans doute, mais pour tout l'reste du monde quand i' paslent dé la belle Jèrriaise la sienne qu'il' ont dans l'idée est bein certainement la belle p'tite vaque Jèrriaise !

 

P. W. Luce

 

Viyiz étout:

 

Les Pages Jèrriaises