Les Pages Jèrriaises

Nouot' chiéthe pétite vaque

Fort Lauderdale,
Florida,
U.S.A.

Lé 12 d'avri, 1975.

Moussieu l'Rédacteu,

"La Compliainte d'eune Vaque", poësie êcrite par man vièr anmîn Edwin John ("Jock") Luce et publiée dans l'almonas d' "La Nouvelle Chronique" dé 1914, m'a tréjous fait penser ès peines et mînséthes dé nouot' belle pétite vaque Jèrriaise tch'a san portrait sus toutes les tinnes dé lait prêservé et appelé "Pet Milk" ichîn en Améthique, et tch'est mus connue à l'êtrangi qué s'n île natale. Comme j'l'ai mentionné d'vant, l's Améthitchains en général né connaîssent pon l'vièr Jèrri. Quand nou lus en pâle i' craient tréjous qu' ch'est New Jersey qu' nou-s-a dans l'idée et ch'est quand nou lus d'mande dé où tch'i' craient qu' la vaque Jèrriaise veint qu' nou peut les faithe rêalîser tch'i' y'a un aut' Jèrri qu' New Jersey.

Mais pour èrvénin à ses peines et minsethes, à chutte belle pétite vaque. La poësie d' "Jock" Luce nouos en donne un fanmeux r'cit, et v'lá tchi vaut la peine dé liéthe. Dans sa compliainte, la vaque nouos raconte sa naîssance dans l'êtabl'ye, et sa vie d'vieau. Comment qu'oulle a l'envie d'téter sa nouorrituthe mais qu'oulle est forchie d'téter l'dé du vachi dans un boutchet à la pliaiche, et comment qu'ou n'est pon seûthe si l'vachi a lavé ses mains d'vant lî présenter san dé à chuchi. Et pis y'a la cruauté d'êt' sépathée d'sa m'mée et forchie à couochi toute seule dans un coin embouêté d'l'êtablye, et yi tch'aime tant sa m'mèe et tchi voudrait couochi auve lyi dans sa stâle.

Sa vie dé g'niche né fut pon fort miyeuthe. Y'avait mème tchestchion d'sa bieauté et s'ou valait la peine d'êl'ver, mais, ma fîngre, auprès aver ieu à subithe la cruauté d'êprouver à l'embelli pour l'expôsition et qu'ou gângnit l'prix d'rêsèrve, i' fut décidé d'la mathier. Mais criy'-ous qu' oulle eut la chance dé chouaîsi san galant? Nannîn, ou fut mathiée à un gros bœu qu'ou n'avait janmais veu d'vant, et finnalement ou fut env'yée en exil dans un aut' monde auprès qu'oulle avait 'té s'pathée d'ses pathents, êfants et anmîns.

Tout chennechín mé v'nait à l'idée en liêsant dans la gâzette du 27 févri qué y'a tchestchion d'env'yer des vaques Jérriaises en Russie. V'la tchi veurt dithe tchi s'en vont aver à dév'nîn Communistes et p't-êt' ajouôter à toutes lus aut' mînséthes.

Ch'est vrai tch'il' en ont, d's aventuthes, les pouorres vaques. Ichîn en Améthique j'en ai veu d'mathiées à des bœus tch'ont des grosses bosses sus l's êpaules, eune race appelée Brahmin tchi veint d'l'Înde. L'idée 'tait d'êprouver à dêvelopper eune nouvelle race tchi donn'nait autant d'richesse dé lait comme la Jèrriaise, et autant d'viande comme l'Îndienne. Mais jé n'sai pon si v'la tch'a rêussit.

L'affaithe en est qu'la pouorre vaque n'a rein à y dithe, à tout chu tripot là, et qué pourtant nou dév'thait lî êt' èrconnaîssants. Ou nouos laîsse adopter touos ses êfants et nouos donne san lait toute sa vie, et tch'est que j'lî donnons comme rêcompense? Lé pistolet et l'couté du bouochi! Et ou continnue quand mème à nouos faithe du bein auprès sa mort jusqu'à tch'i' n'en reste rein sénon sa mémouaithe s'oulle a gângni des prix.

Enfîn, espéthons qu'les cheinnes tchi s'en vont êt' exportées en Russie îthont dans l'pays d'l'Ukraine, car les gens d'chu pays là sont d'bouannes pèrsonnes. J'en connais gentiment ichîn en Améthique tchi sont d'là-bas et jé l's aiment hardi. Et, auprès tout, qué les vaques déveinnent Communistes ou pon né f'tha pon grand' difféthence dans l'monde. Les cheinnes tchi veinnent dé St. Ouën et tch'ont gângni des prix sont du parti Louothi mais i' n'ont janmais ieu la chance dé voter ès êlections. Ch'est assez drôle, quand nou-s-y pense, tch'i' n'y a qu'les vieaux tchi sont pèrmîns d'voter!

Ch'tait întérêssant d'liéthe les r'mèrques des membres d's Êtats au sujet d'amalgamoter l's églyises dé St. Simon et d'All Saints. J'tais amûsé d'vaie qu'la grand' partie d'ches membres tchi prîndrent la pathole né sont pon Anglyicans et tch'i' n'comprennent pon tch'est qu'l'amalgamot sîngnifie ès Anglo-Catholiques Anglyicans. Mais j'sis content d'vaie qu' Moussieu l'Douoyen dit tch'i' n'y a pon tchestchion d'freunmer l'Églyise dé St. Simon.

Ch'est un drôle d'amalgamot. La congrégâtion d'All Saints n'est probabliément pon à s'n aîse dans l'atmosphéthe parfeunmé d'enchens des sèrvices à St. Simon, et ch'est bein seux qu'les Anglo-Catholiques tch'ont tréjous vénéthé St. Simon comme lus p'tite cathédrale né lus trouvent pon à l'aîse dans l'églyise d'All Saints, et auve lé trépas du bouan vièr Douoyen L'Mathinné, i' n'ont pus d'champion ni d'support en Jèrri. Né v'la la vraie tragédie d'l'amalgamot! Et y'a la tchestchion du probytaithe. Si un minnistre ênèrgique entréprannait d'ravigoter St. Simon, éthait-i' drouait à la maîntchi du neu probytaithe?

George d'La Forge

 

Viyiz étout:

 

Les Pages Jèrriaises