Quand j'tais pus janne j'allais à pid touos les jours auvec ma tchianne Su-An.
Un Jeudi au sé j'faisais un tou des clios auvec Su-An près de la ferme à not' vaîsîn Mess Perchard. Y'avait eune belle vaque et deux p'tites géniches, qui 'taient à mangi dans l'clios, mais Su-An décidit de couorre au d'ssus du wire électrique.
'Ah mais' j'dis: 'vint-en îchin!' Mais ma tchianne n'êcoutit pon, ou voulait jouer auvec les géniches.
J'rentris dans l'clios, pouor attrapper la tchianne. Mais en sortant douochment j'mins mes gambes par dessus l'wire d'électricité, et je n'vis pon chutte vaque-là à belles cornes qui v'nait souotre ma tchianne et mé la tête en bas.
Opla! J'n'avais pon bésoin d'èrchéver eune chèrge d'électricité, car la vaque mé fichit un coup d'cornes à pliein dans ma gambe.
Auprès lé choque des cornes j'trouvis qué ma gambe 'tait mouoille. J'ergardit mes braies, et i'taient toutes triyies. Quand j'ergardit d'un miot pus près ma gambe 'tait triyie étout! En choque ma preunmièthe idée 'ch'tait qué du pliaître ne pouvait pas faithe et j'c'menchis à marchi amont la cache.
J'vis Mess Jeanne auvec son tracteu. D'habitude, quand j'lé vai, j'li crie lé pauchi en l'air, mais pas chutte fais! J'restis pliantée la, le pauchi en bas! I'm'donnit un coup d'main pouor aller siez nous.
Mon péthe et s'n anmîn tchittîtent dé bàti l'garage. Quand i'vit l'êtat dé ma gambe man péthe mé dit: 'I 'faut aller à l'hôpita.' Et i'demandit a s'n anmîn dé nos apporter là bas. Mais lé choc d'aver veu ma gambe, lé fit enervé et i'fit quàsiment un tou d'l'Ile. Quand j'vînmes au rond-point à Rouoge Bouoillon lé moto 'tait sus deux ruelles et j'étais contente quand j'arrivis à l'hôpita!
Et tout d'la faute à la belle vaque à Charlie!
Angela Le Pavoux
Viyiz étout: