I' n'y avait pon qu'lé rouai tchi pouvait r'dgéthi lé mal au rouai. L'orvale, eune pliante bein connue d's anciens, 'tait bouanne pour ch'la étout, et i' disaient: "D'l'orvale tchi sique et tchi hale!" Les fielles 'taient bouannes pour mett' sus des frouëts. D'la vèrveine 'tait bouanne pour ch'la étout. Il' en êcrâsaient les fielles pour faithe un empliâtre sus un dé êgliami. L's anciens dîsaient qué d'la vèrveine (j'en ai veu tchi craissaient sus eune muthâle à Portinfer) pouvait dgéthi toutes sortes d'maladies, cachi les chorchièrs, èrconcilier l's ennemîns, et env'yer un sort. Quand oulle 'tait faite sèrvi pour dgéthi l'mal au rouai, lé dictionnaithe nouos dit tch'i' fallait en prandre d'la réchinne, prannant soin qu'ou fûsse dêraichinnée en sorte tch'i' n'en restait pon un seul brin d'réchinne en tèrre ou dans la muthâle, et fallait enfiler ou attatchi un mio d'chutte réchinne à un riban pour qu'ou n'tchaie pas et l'pendre au co du souffrant. et pis fallait brûler l'reste d'la réchinne, et pendre lé fieillage dé chutte pliante à la cheunm'née, et à m'suthe qué ch'la s'tchait, lé ma s'tchait étout jusqu'à étre parfaithement dgéthi!
Ch'tait un tas d'prépathâtions pour dgéthi l'mal au rouai, mais i' pathaît qué v'la tchi n's'en allait pon aîsiement à mains qué ch'fûsse par les mains du rouai li-même, et l'histouaithe nouos dit qué lé 11 dézembre, 1649, quand l'janne Rouai Charles Deux 'tait dans l'Châté Êlizabé, onze pèrsonnes fûdrent ammenéees d'vant li pour ét' dgéthis d'chu ma-là. Dans la chapelle du châté, i' lus mîndrent à g'nouors at lé rouai lus mînt sa main sus l'épaule et i' s'en r'fûdrent siez-ieux, mais l'histouaithe né nouos dit pon s'i' fûdrent èrdgéthis!
Enfîn, i' faut penser tch'i' n'couôtait pon grand' chose pour les gens d'chu temps-là à lus r'faithe quand il' 'taient malades, et ch'tait p't ét' à ch't êpoque-là qué l'diton "I' faut vivre vyi ou mouothi janne" fut înventé. Mais i' n'pouvaient pon empêchi l'progrès, même dans chu temps-là, et l'nommé Salomon Journieaux (nouos dit l'dictionnaithe) fut l'preunmié docteu, Jèrriais d'naîssance, dans l'Île. Il 'tait fis Ph'lippe, Juré-Justicier, et d'Catherine Gosselin, sa deuxième femme. Ch'tait vèrs la fîn du seizième siècl'ye.
George d'la Forge Les pliantes méd'cinnales, Gâzette du Sé 27/10/1969
Viyiz étout: