Lé Ménage ès Feuvres,
St. Ouën
Lé 24 juin, 1967
Moussieu l'Rédacteu,
L's engagements et les mathiages du temps passé s'faîsaient souvent entre filles et garçons du vaîsinné. Les fèrmièrs s'entr'aîdgaient bein pus qu'à ch't heu. I' n'y avait pon la machin'nie d'nouos jours, et ch'tait lé j'va tch'était la main gauche du fèrmyi. Ch'tait li tchi halait l'hèrnais pour aller au vrai et la vainne pour transporter les câssées d'patates au clios dans la pliant'tie et les bathis dans la dêfouithie, et les patates en ville dans la saison. Et ch'tait li tchi halait la tchéthue à plianter. Il en faîsait bein d'aut' - comme lé transport des récoltes du clios et du fain au solyi, etc. Mais il en fallait pus qu'iun pour la touan'nie d'tèrre. Ch'tait eune occasion spéciale, et les fèrmièrs du vaîsinné s'entr'donnaient l'coup d'main et am'naient lus j'vaux car il en fallait un coupl'ye sus la p'tite tchéthue et tchiquefais huit sus la grand' tchéthue!
Lé sé d'chu jour-là s'passait en rêvillon - d'la musique, d'la dans'sie et du chant et tchiquesfais ch'tait lé c'menchement d'eune accointance entre garçon et fille tchi m'nait à l'engagement et l'mathiage. Nou peut s'înmaginner un coupl'ye lâssés d'danser et voulant prendre l'air tchiques minutes, dêhaler au cliai d'la leune et l'garçon dév'nu amouotheux et extâsié par la lueu mystéthieuse dé la leune, dithe à la janne fille. Ah! Tchi belle leune, à ces sé!, et pis, en li r'gardant dans l's ièrs et auve sans bras l'tou d'sa tâle :-
- Si tu m'aimais et qué j't'aimais.
Mé voudrais-tu si j'té voulais?
Ah! Bouan Dgieu vielle qué j't'aie.
Car j't'aime et j'té voudrais!
À m'n idée, ch'est seux qu'oulle a aîdgi hardi à faithe d's engagements la leune! Mais l'églyise et la chapelle ont aîdgi étout!
Jé crai qu'nou peut dithe qué dans l'temps jadis comme dé nouos jours, pus d'femmes qué d'hommes ont hanté les lieux d'tchultes. Quand j'tais mousse tout l'monde y'allaient à pid, sénon p't êt' tchiques mêssieux tch'i' y'allaient en cârosse. Les jannes hommes allaient à la sortie d'l'églyise et d'la chapelle au sé pour èrcondithe les filles tch'en sortaient, et l'rêsultat 'tait étout souvent l'engagement et l'mathiage. Dans chu cas, l'engagement 'tait tchiquesfais entre garçon et fille dé difféthentes pâraisses et l'janne homme dé St. Jean ou d'La Trinn'té tchi s'enmouothachait d'eune janne fille dé St. Ouën avait eune fichue distance à marchi pour s'en r'aller siez-li, sustout s'il 'tait l'beinv'nu siez les pathents d'la fille et tch'i' restait tard siez lyi à souper et lî dithe des milles fais combein tch'i' l'aimait! Mais les c'mîns n'pathaissent pon longs quand nou-s-est en amour!
Les garçons n'aimaient pon tréjous vaie les cheins d'eune aut' pâraisse v'nîn r'condithe les filles dé la leu, et s'i' n'avaient pon l'ambition d'en r'condithe ieune ieux-mèmes y'en avait tch'allaient lus muchi driéthe les fossés d'la route par ioù qu'l'aut' parouaîssien éthait à passer pour èrcondithe la janne fille. Et pus il' atchumulaient un lopîn d'bliêtes et prannaient grand pliaîsi à l'bliêter quand i' v'nait endrait ieux. Dans des temps la janne fille au bras du chein tch'èrchévait l'achie d'bliêtes en r'chévait tchitcheunes étout, mais, en général, i' happaient la pathe ava la route touos les deux et i' n'y avait pon grand ma d'fait. Y'en avait sans doute tchi lus r'bînfraient, mais i' fallait aver du couothage pour s'èrbînfrer, car i n'y avait pon mouoyen d'saver combein d'gas tch'i y'avait driéthe lé fossé!
I' n'y avait pont tant d'malfaiteurs par les c'mîns comme y'en a à ch't heu, mais i' s'en trouvait iun ou deux d'temps en temps. M'n oncl'ye Ouinn'teur, tchi mouothit en Dgèrnésy y'a tchiques années quand il avait passé sa huiptantaine, mé dit eune fais dans san vivant qu'en s'en r'vénant d'condithe eune fille à St. Jean un Dînmanche au sé un gas tch'était muchi dans la hèche du chînm'tchiéthe dé l'églyise dé Ste. Mathie l'apostrophit comme i' passait par là. I' lî d'mandit tchil heuthe tch'il 'tait et êprouvit à gaffer sa montre quand i' la dêhalit et satchit eune alleunmette pour vaie l'heuthe. Et mênagit-i' a t'la prendre, j'dis à m'n oncl'ye. Mais nannîn! i' m'rêponnit, J'tais pus prompt qu'li, chu pouorre achocre-là! J'li fichis man poing dans la goule et l'tchulbutis t... par sus tête! 'Là!', j'li dis. 'Èrpôses-té là eune volée - l'chînm'tchiéthe est eune bouanne pliaiche pour s'èrpôser!
Lé passage du temps a apporté bein des changements et l's amouotheurs sont pus à l'aise à ch't heu dans des motos qué dans la rue au cliai d'la leune. Mais l'amour est l'amour, et l'vièr diton. Mathyie-té ou n'té mathyie pas, ta crouaix tu portéthas!, s'appl'yique acouo au jour d'aniet!
George d'La Forge
Viyiz étout: