Quand j'té vai apparaître
De mé je n'sîs pûs l'maître:
Un je n'sai tchi
Me monte à la pouôr' tête,
Et me fait v'nin si bête.
Sai-tu pourtchi?

Quand parfeis je t'embrache
J'admire ta bell' fache,
Et tes biaûx g'veux,
Man tcheur, qui saûticotte,
Veur dire, ma cocotte:
Comblle mes voeux!

Ne v'chin la fin d'l'annèe,
Noué, - toute la pann'nèe,
Et les court' jour'!
Ch'est ichin l'temps, fillètte,
Des jeux et des blluèttes,
Et des amour'!

Pour de mé j'en enrage -
De veis le tas d'mariages
Dans chut' saîson.
I' y-a longtemps que j'prie,
Que j'pllaide et que j'suppllie,
Ouai dôn raîson!

Tu m'appelle êtiboque:
De tout chonna tu t'moque -
Tu n'en veur rein.
- Sam'di, la p'tit' rîndelle,
A tan deigt, ma hardelle,
Paraîtra bein!

P.
1889