J'ai unn' supèrbe fèrme,
Unn' belle grand' maison,
Eh bein ! - et j'vos l'affièrme -
Je m'pllaîns, et j'ai raîson :

I' m'manque occouo unn' chôse,
Pour orné mân châté,
J'y-ai pênsè d'pîs unn' paûse -
Si n'ou pouait l'acaté!

- "Tu n'es qu'un îmbécile,"
Ma moman m'dit souvent ;
" Et par trop difficile :
Tu-anvîe ta chance au vent.

" Tu n'tcheîns dôn pas d'tân péthe :
Ch'en' tait-la, un grivouaîs!
Je ne s'sais pas ta méthe,
S'il avait tè chein qu'tu-es.

" J'tion' sûs le k'min d'la vile
Touôs seur, en nos z-n'allant.
I' m'dît : Tu m'pllaîs, ma fille!
Râché ! j'sîs tân galant."

- Oprès, ou' m'dit : Mân George
Ch'est unn' leçon pour té,
Tu'es l'beinv'nu à la Forge -
I' faoût en profité.

Ch'n'est pas unne vrédache :
Ou' souogne à sân travâs ;
Ou' chinne à raidde-brache -
Ch'n'est pas là du tracâs !

Ou' peut foui des cârottes,
Et êrachi des trous,
Ou' te f'tha quand j's'sai horte -
Tu n'méthâs pas tréjous!

- Je sai tchi m'en faoût iunne :
Ne v'là j'ai vingt-neuv' ans.
S'sache unn' blonde, ou unn' brunne?
Ch'est l'chouaîs tchi m'est grévant,

Ch'est Vrai, je chèrche unn' famme;
Mais, lâs! j'm'y r'connais pon.
Pouôréthi-ous bein, mesdammes,
Me r'quémandé d'tchi bon?

George Flippe
1890