Les Pages Jèrriaises

Trais vouaix tragiques!

Fort Lauderdale,
Florida, USA.
Lé 7 dé févri, 1981

Moussieu l'Rédacteu,

J'ai ieu la chance chutte sémaine. J'ai r'chu la gâzette dé Jèrri du 13 dé novembre 1980, et ouaithe qué ch'est des vielles nouvelles dé pus d'deux mais tchi sont d'dans, ch'est quâsi comme si ch'tait eune visite en Jèrri d'pouver les liéthe.

Sans doute, i' n'sont pon toutes pliaîsantes, les nouvelles - comme la cheine tchi nouos dit qu'eune dgaingue dé jannes malfaiteurs 'taient à couôrre les c'mîns et d'pichi les f'nêtres au monde atout d's êlîngues en pâssant dans les rues auve des motos. Eh bein, comme j'l'ai mentionné bein des fais, à m'n idée l'seul mouoyen dé traiter ches jannes malfaiteurs-là est la baïette, bein astitchie, et pis faithe les pathents payi pour les d'gâts.

J'avons l'même problème en Améthique. Pour lé moment, ch'est l'endonmagement d's êcoles tch'est lus favorites activités la niet. Et comme en Jèrri i' sont présentés d'vant es "Juvenile Courts" tch'ont peux d'les peunni comme i' faut, et les mousses lus en moquent, dé ches cours-là, et continnuent lus mauvaises condites.

En pâlant d'êlîngues, v'là tchi m'ramémouaithe qué j'en avais ieune étout quand j'tais mousse. Nou peut dithe qué quâsi touos les mousses en avaient, mais nou n'éthait janmais pensé dé d'pichi des f'nêtres ou faithe dé ma à pèrsonne atout. Ch'est vrai qué nou tithait sus un pouôrre pétit mouosson d'temps en temps tch'était jutchi dans les bouais, et j'ai r'gretté ch'la dans mes vièrs jours. Ch'est quand nou vieillis qu'nou c'menche à vaie qu'ch'est eune mauvaitchi dé tuer un pouôrre pétit ouaîsé tch'est eune criatuthe du Bouan Dgieu et tch'a l'drouait dé joui d'sa vie.

Dans chutte gâzette du treize dé novembre j'vai eune articl'ye au sujet des minnistres Anglyicans tchi m'întérêsse hardi. Est'ch' qué ch'n'est pon honteux qu'un minnistre, né en Jèrri, est forchi d's'en aller hors pays pour géther sa vocation d'minnistre, et qu'en même temps i' faut freunmer d's églyises viyant tch'i' n'y'a pon assez d'minnistres pour les dèssèrvi?

À m'n idée, il est grand temps d'faithe un "Êvêché" ou Diocèse des Îles dé La Manche. V'là tchi pèrmett'tait ès Îles dé condithe lus affaithes ieux-mêmes et d'souangni d'lus églyises parouaîssiales et chapelles d'aîse. Ou-s-allez p't-êt' mé dithe qué v'là tchi couôtt'tait trop. P't-êt' bein. J'sis p't-êt' trop liain d'Jèrri pour aver eune solide idée des conditions tchi gouvèrnent bein des choses dans l's Îles, mais i'n'sembl'ye qué les sou qué l's églyises sont oblyigies d'fourni au Diocèse dé Winchester touos l's ans pouôrraient probabliément suffithe pour supporter l's églyises d'un Diocèse des Îles même.

Entr'aut' choses tchi m'pathaîssent riditchules, par exempl'ye, est qué l's églyises dé St. Simon et d'St. Jacques sont sans minnistres - et nou peut p't-êt' mett' St. Matchi dans la liste étout - et qué l'Révérend Tony Hart, Jèrriais d'naîssance et tch'a pâssé sa vie en Jèrri, est forchi d's'en aller hors pays pour géther sa chèrge d'minnistre. Né v'là chein tchi s'arrive quand l'Églyise et gouvèrnée par un Êvêque en Angliétèrre tch'assujetît l's Îles ès conditions Angliaiches.

J'ai tant dé r'gret d'vaie la nouvelle qué la belle vallée mênommée "Queen's" s'en va êt' inondée qué j'en ai 'té triste en mé-même dépis. Et par eune pétite mâjorité dé seulemnt deux vouaix dans L's Êtats! V'là tchi veurt dithe qu'eune belle partie d'l'Île s'en va êt' avraûnée par la vouaix dé trais pèrsonnes dans nouot' Chambre Législative. Nou n'peut même pus s'fier sus l'bouân sens des membres campangnards. I' lus laîssent m'ner par lé nez par les bieaux discours dé tchiques membres villais tchi sont supèrbes orateurs! Et né v'là chein qué l'tourisme nouos a apporté, car i' n'y'a pon d'doute dans m'n idée qu'ch'est les bains et les piscines, et l'avarice des gens d'hôtel, tch'ont engendré l'supposé bésoin d'aver tant dg'ieau disponibl'ye dans l'Île.

J'crai bein qu'l'Avocat Falle en est aussi d's'appointé comme mé. J'espéthe qué les Jèrriais lî sont r'connaîssants pour aver travailli si dû pour prêsèrver la bieauté d'la vallée.

J'né s'sai pon probabliément là dans tchiques années à l'av'nîn pour vaie si la crainte dé cèrtains qué la ruinne dé chutte vallée n'est qu'un c'menchement et qué "La Vallée du Mourier" es'sa la préchaine. Est'ch' eune prophésie tch'a d'la probabilité?

George d'La Forge
 

Viyiz étout:

 

Les Pages Jèrriaises