Trenton,
Michigan, USA.
Lé 3 d'novembre, 1979.
Moussieu l'Rédacteu,
La dreine gâzette èrchue d'Jèrri est la cheinne du 30 d'août mais d's anmis d'Califournie m'en ont env'yé deux, les cheinnes du 20 et du 27 dé septembre. J'vouos asseûthe, bouannes gens, qué ch'est grand' fête pour un Jèrriais à l'etrangi d'êrchéver des nouvelles dé Jèrri tchi n'sont qu'un mais en r'tard.
Dépis qué l'sèrvice postal va en r'tchulant au jour d'aniet à la pliaiche dé prendre dé l'avo, i' n'faut pon s'attendre à r'chéver rein en vitesse par poste. Et ch'n'est pon seulement Jèrri et l'Angliétèrre tch'en souffre.
Eune lettre env'yée à man n'veu à Ottawa au Cannada, rein qu' 500 milles d'ichîn, prîns tchînze jours en c'mîn, et j'peux cachi la distance en, moto dans dgiex heuthes! Né v'là la sorte d'sèrvice à tchi nou peut s'attendre dépis qu' ch'est l's unions tchi gouvèrnent.
Tant pus qué l'temps s'pâsse, tant pus nou vait par la gâzette qué Jèrri n'est pus l'pays des Jèrriais. Sus vîngt-huit naîssances annoncées dans les deux du 20 et 27 dé septembre, i' n'y'a qué quatre vrais noms Jèrriais!
Dans les décès, j'ai r'gret d'vaie l'nom d'eune couôsinne, Dorothy Mabel Larbalêtchi, née de Gruchy. Sa m'mèe et man p'pèe 'taient couôsins gèrmains. J'eus l'pliaisi d'la vaie et d'lî pâler dans l'restaurant Marina à L'Eta, où'est qu' oulle 'tait en compangnie d'san fréthe Harold et d'sa belle-soeur. Lé drein Dînmanche qué j'tais en Jèrri, vèrs la fîn du mais d'août, dévant m'en v'nîn en Améthique. Mes condoléances à ses fréthes et soeurs.
Sus la gâzette du 27 dé septembre j'vai, auve grand pliaîsi, la pliaîsante fache du Sieur Percy L'Masuthi, d'La Pointe, à St. Ouën, un vaîsîn et anmîn sus tchi nou peut tréjous s'fier, et j'espéthe qué un vaîsîn et anmîn sus tchi nou peut tréjous s'fier, et j'espéthe qué les Jèrriais né sont pon à l'bliaumer pour la renchiéthe du lait. Sans en saver pus long, étant liain d'Jèrri à ch't heu, j'sis seux tch'il est à faithe dé san mus pour garder l'prix du lait à bas. Et comme il a un bouan troupe d'vaques li-même i' sait bein tch'il en couôte tant pour les maint'nîn qué l'fèrmyi tch'en garde a d'la peine à s'y r'faithe.
Ch'est r'mèrquabl'ye qué les Dgèrnésais peuvent vendre lé lait à miyeu marchi qu' les Jèrriais. Tch'est tchi sait, i' sont p't-êt' à traithe les ânes, et i' daivent saver qué nou n'peut pon traithe les crapauds! Mais, badinnage à part, i' vaudrait p't-êt' la peine dé les consulter au sujet - comme il en est suggéthé dans l'mangnifique articl'ye d'fond dans le gâzette.
I' faut féliciter lé Sieur Job, maître d'êcole dé St. George, pour aver travailli si dû pour êt' prêt pour l'ouvèrtuthe dé s'n êcole en temps voulu. Mais j'ai r'gret d'vaie l'magnifique Mangni d'La Hague sans un seigneu à l'garder en ûsage comme mangni, prîncipalement un seigneu Jèrriais dîngne d'êt' lé successeur du Colonel C.P. Le Cornu, dé mémouaithe respectée. Dans l'portrait du mangni dans la gâzette, j'vai les mousses à codpîser lus balle sus l'herbe en d'vant. J'mé d'mande combein longtemps qu' la p'louse s'en va duther souos des circonstances dé même. Ch'est eune bouanne chose qué l'vièr Coronel n'est pus là à vaie san mangni pèrdre sén ancienne dîngnité.
J'vai qué l's autorités sont acouo à autoriser l'agrandissement d'hôtels et l'êtablissement d'bangnérêsses ouaithe tch'i' y'a supposition d'un manque dg'ieau dans l'Île en êté pour acc'moder tout l'monde et les touristes. Et telle autorisâtion pour eune hôtel au Havre des Pas - auve la grève à côté pour pouver s'bangner, et la bangnèrêsse du Jersey Swimming Club à deux-s'trais pas - mé pathaît drôle. Et nou sé d'mande s'i' y'a rêellment bésoin d'un deuxième “comptoir de cabaret” (“bar” en Angliais) pour les b'veurs quand i' y'en a dêjà iun dans l'hôtel même.
Eune chose qué j'vais dans les gâzettes est qué l's accidents en moto continnuent comme dé pus bé dans l'Ile. Cèrtainement la baithie est encouothagie à la pliaiche d'êt' condamnée, et pourtant j'vai acouo bein trop d'motoristes présentés d'vant Justice pour aver bu trop.
Mais y'a eune chose tch'i' pathaît y'aver en abondance en Jèrri - ch'est des sou! Quand nou vait eune affaithe dé deux millions d'louis votés par Les Etats pour couvri “Supply Day requests” nou sé d'mande dé où'est qu' touos ches sou-là s'en vont v'nîn. I' pathaît qué j'sommes à court dé sou ichîn en Améthique. J'espéthe qué l'Président Carter n'avait pon les gâzettes dé Jèrri. “V'la tchi lî donn'nait p't-êt' l'idée d'en empreunter d'l'Ile pour renforchi nouot' dollar!
George d'La Forge
Viyiz étout: