San Antonio,
Texas, USA.
Lé 18 dé févri, 1978.
Moussieu l'Rédacteu,
Ma bouanne chance continnue - j'ai r'chu la gâzette dé Jérri du seize dé dézembre et j'viyais qu'eune êlection pour Juge 'tait sus les rangs et tch'i' y'avait eune femme tch'avait l'ambition d'mett' la rouoge robe ouaithe qu'ou n'eûsse pon d'chance à l'occâsion d'la dreine êlection. Quant à mé, j'voulais vaie Moussieu Simon en gângni. Né v'là un charmant moussieu tch'a toutes les qualités voulues pour êt' sus l'Banc d'Justice. Lé fait tch'il 'tait prêt à c'menchi pûtôt au bas d'l'êtchelle dé la Police Honorifique et sèrvi l'publyi comme Chent'nyi quand i' s'èrtithit d'affaithes comme bantchi est preuve, pour un homme dé san calibre, tch'i' n'a pon d'peux d'sa peine.
J'tais content d'liéthe qué les Sèrtchais sont décidés d'consèrver lus bâtiments historiques. L'articl'ye au sujet dans la gâzette mentionne la tchuthieuse chose qué l's armueûthies d'Sèr né montrent qué deux léopards, et l'auteur nouos dit qué quand Dgilliaume lé Contchérant fît la Contchête l'Angliétèrre i' gardit l's armueûthies d'Nouormandie - ch'est à dithe “les deux lions ou léopards”. Et qué quand lé Rouai Jean la pèrdit en 1203, l'Angliéterre, Jèrri et Dgèrnésy changîdrent les deux léopards à trais mais que Sèr gardit les deux.
Eh bein, jé n'prétends pon vouler faithe autcheune pèrsonne craithe qué j'mé r'connais dans la “Science Héraldique” mais j'ai tréjous 'té intérêssi dans les léopards sus nouot' sceau d'baillage et nouos sou, etc., viyant qué j'n'ai janmais pèrdu espéthance dé les vaie sus la couleu d'Jèrri à la pliaiche dé la crouaix d'St. Patrice. Et quant à la tchestchion dé deux ou trais léopards, j'ouïs eune întérêssante distchussion au sujet eune fais quand j'tais à l'Abbaye d'La Lucèrne en Nouormandie tchi m'fait penser qué seulement deux léopards sus l's armueûthies d'Nouormandie n'est pon correct.
Un grand savant Nouormand m'dît qué dans l'temps des “tournois”, quand les c'valièrs 'taient accoutrés auve les “armures” en fé auve lé casque sus la tête, i' n'puvaient pon s'entre'èrconnaître en dgèrre ou en tournoi, et qué cèrtaines contrées adoptîdrent les deux léopards sus lus êtchussons et banniéthes pour s'entr'èrconnaître sus l'camp d'batâle ou sus l'camp du tournoi, mais qué ch'tait eune affaithe armueûthies avaient les trais léopards pour toute la Nouormandie.
J'avais espéthé qué la tchestchion d'changi la couleu d'Jèrri éthait fait partie d'l'agenda dans L's Etats l'année pâssée - année d'jubilé - mais i'n'y'a appathemment pon assez d'membres întérêssis pour pousser l'affaithe. Si janmais v'la tchi s'arrive, j'sis en faveur, comme j'l'ai mentionné d'vant, d'adopter la couleu pendue en d'ssus du siége dé Moussieu l'Bailli dans la Chambre d's Etats comme patron. S'i' y'a autchun doute au sujet dé l'identité d'la nationalité - Angliaiche ou Nouormande - dé ches léopards - là, i'n'y'a qu' à s'en entchêter; lé Collège Héraldique ou l'Abbé Le Légard nouos l'dithaient tout d'suite.
Tchi tîntamarre dans L's Etats au sujet du radio et d'la manniéthe d'acater la papet'tie et aut' nécessités pour les êcoles! J'vai qué l'Député Mde. Sandeman n'eut pon fort dé support dans sa critique. Pourtant, d'après les chiffres montrés dans la gâzette, tchi m'pathaîssaient pûtôt difficiles dé compréhension, ou m'pathaîssait aver un tas d'raîson d'crititchi.
Quant à la tchestchion du radio, jé n'voudrais pon exprinmer d'opinnion viyant qué jé n'sis pon sus les lieux, mais quand à la sinn'nie d'pétitions j'sis du même avis qué l'Sénateu Morvan qué les pétitions né valent pon grand' chose et tch'i' n'sont pon d'împortance car le monde, en pâssant, sinnent autcheune chose sans lièthe tch'est tchi'i' sont à sinner. J'en vis la preuve quand j'tais en Jèrri dans l'temps tch'il' en sinnaient ieune entouôrre lé Fort.
Y'a un portrait d'l'arrivée du train du “Jersey Railways & Tramways Ltd.” dans la stâtion d'St. Aubîn tchi m'întérêsse hardi car j'allais d'dans touous les jours dé La Mouaie en ville quand j'tais clèrcot dans La Rue ès Trais Pigeons. J'èrconnais iun d's hommes début sus la pliateforme comme étant lé Sieur Ben Shenton. N'était-i' pon lé Papa au Sénateu Shenton? Ch'tait un charmant corps, lé bouanhomme Ben. Assis à côté d'li sus un banc à St. Aubin pas bein d's années d'vant san décès, j'fus charmé d'apprendre tchi'i' pâlait l'Jèrriais. La pèrsonne tch'est d'but à l'entrée du compartîment justement en driéthe dé l'engîn, prête à d'scendre sus la pliateforme 'tait Mdlle. Eleanor Kathleen (“Nellie”) Falle, pus tard Mde. Hasler, tchi mouothit à Londres en Janvyi, 1977, à l'âge dé 87 ans. San p'pèe soulait garder boutique, dans eune maîson appelée “Oporto House” dans chu temps-là, à côté d'la Chapelle Méthodiste. Lé portrait fut prînt pus tard qué “dans les 1890” comme nouos l'dit la gâzette. Ch'tait pûtôt entre 1907 et 1910.
George d'La Forge
Viyiz étout: