"I' parait," s'fit l'Ph'lip Desclios quand jé l'rencontris hier en ville dans l'Vièr Marchi, "qué l'aut' sé l'Assembliée d'Jèrriais fûtent visiter lé rêsèrvoir qu'i' sount à bâti à Grouville. Y fus-tu?"
"Mais nânnin djà," j'lis dis, "j'vais 'té par là y'a tchiques sémaines, et du haut d'la Rigoundaine j'pus vaie coumment qu'il' ount saccagi la vallée. V'là tchi m'fit v'ner les lèrmes ès ièrs, des lèrmes éd hounte et d'rage. I' nos est dit dans l's'Ecritures qué j'dévouns pardounner les siens tchi nos fount tort, mais quant à mé jé n'pardounnrai jamais, ma vie duthante, les siens qui sount réspounsablyes pour ch't'acte éd trahisoun. Dé penser qu'j'avouns laissi ches vandales-là faithe pus d'dommage à Jèrri qué né l'fîtes les Allemands duthant chinq ans d'otchupâtioun! Et d'même, si j'avais 'té là-bas avec l'Assembliée, j'crains qué j'n'éthais pas peu m'empêchi d'faithe la clameur dé Haro, et v'là tchi n'éthait servi d'rein car lé dommage est déjà fait et n'peut pas être dêfait."
"En êffet," s'fit l'Ph'lip, "v'là tchi m'a fait mal au tchoeu étout dé vaie ieunne des pus belles vallées d'Jèrri dêtruite, mais i' parait qué j'n'avouns pas d'chouaix, et s'i' n'bâtissent pas chu rêsèrvoir j'allouns tous créver d'sé."
"Mon Ph'lip," j'lis dis, "tu sai bein qu'les malfaisants sount tréjous bein adèrts à trouver d'buonnes raisouns pour lé mêchét qu'i' fount. I' prétendent qué chu rêsèrvoir ch'est pour lé bénéfice et l'beinêtre dé té et mé. Tu n't'as pas m'dithe qué tu crai d'ité niolîn? Nou-fait, ches messieurs-là nos prannent pour des achocres. Pourtchi qu'i' nos faut pus d'ieau? Ch'est viyant qué, pour l'amour dé remplyi lus pouchettes déjà bein trop b'santes il' ount attiré ichein en Jèrri eunne populatioun, sans coumpter les touristes, deux fais pus grande qué les ressources éd l'île né peuvent souâst'ner. Dans not' temps j'souffraimes dé temps en temps d'eunne grande sécrèche, mais j'avaimes quandmême assez d'ieau, car la populatioun d'chu temps là 'tait au pus eunne chinquantaine dé mille, ch'est à dithe pas pus qu'nos ressources pérmettent. Dé s'mett' à acc'moder sus eun terrain d'eunne quarantaine dé milles carrés lé mounde qué j'avouns achteu ch'n'est ni raisonnablye ni dans nos vrais intérêts, et ch'est countre la louai d'la natuthe. Et d'sé buter countre la louai d'la natuthe ch'est d'coumettre eune péché countr' él Saint-Esprit, et n's'ra jamais pardounné. Dé touas les péchés ieun des pus vilains ch'est l'péché d'la gourmandise, et rein qu'la gourmandise qu'a m'né ches malfaisants-là à nos voler d'not' héritage, la biauté d'not' Île."
"J'sis d'accord," s'fit l'Ph'lip, "mais tu veinnes dé m'dithes té-même qué l'dommage est déjà fait et qu'lé n'pouvouns pas l'dêfaithe. Puisqu'il en est d'même estch'qu'i'n'vaudrait pas mus d'accepter chein qu'nou' n'peut pas changi, et enfin dé s'taithe la goule?"
"Mon Ph'lip," j'lis dis, "quand y'a ieu eune crime si ênorme éd fait i'n'faut jamais s'taithe et l'accepter. J'avouns lé d'ver d'faithe à saver à nos êfants et lus êfants coumment qu'il' ount 'té frustrés dé lus patrimoine et d'lus héritage. Jé n'dévouns jamais laissi en paix les siens qui l's'ount frustrés. I' faut qué j'faisouns d'sorte qué l'noum d'ches criminels sait inscrit à tout jamais dans l'régistre des înfâmes."
"Dgiâtre-sai," s'fit l'Ph'lip, "té v'là en bouan' êpart à matîn! V'là tchi m'a fait tant d'bein dé t'êcouter qué, véttan, j'm'en vais t'payi eunne fais à bèthe."
Et j'vos promets, bouannes gens, qué ch'n'est pas touas les jours qué l'Ph'lip paye eunne fais à bèthe à persounne.
Lé vièr Trin'tais
JEP 31/8/1990
Viyiz étout: