Ottawa, Ontario,
Canada.
Lé 13 dé mai, 1971.
Moussieu l'Rédacteu,
Eune anmie m'a prêté deux-s'trais Pilotes dé l'églyise Anglyicanne en Jèrri, et j'ai 'té hardi întérêssi à liéthe les articl'yes des Recteurs et Vitchaithes des églyises parouaîssiales et chapelles d'aise. Dévant dithe autcheune aut' chose, j'veur mentionner qué l'preunmié prix va à Moussieu Manton d'St. Jean pour les pus întèrêssantes articl'yes dé toute la dgaîngue. Et ch'n'est pon seulement eune fais, nouos donne tchiquechose à liéthe tchi vaut la peine!
Pour mé, tch'est bein liain d'Jèrri la grand' partie d'l'année, l's êvènements tchi s'pâssent dans l's églyises dé l'Île et d'l'Angliétèrre sont d'grand întethèt, et ch'est en liêsant des lettres du Révérend Peter Manton qué j'apprends les nouvelles du jour. Par exampl'ye, jé n'savais pon qu'eune Commission d'Révision en Angliétèrre est en train d'modèrniser l'Angliais d'La Litourgie, et Moussieu Manton, dans sa lettre du mais d'dèzembre pâssé, nouos donne eune idée du changement des patholes dans lé Gloria in Excelsis Deo. Tchi danmage! Lé langage dé La Litourgie est si gravé dans nouos esprits auprès l'aver fait servi pour tant d'années - quâsi huiptante dans man cas pèrsonnel - qué ché s'sa pénibl'ye d'êprouver à l'changi en chantant les louanges du Bouan Dgieu. Jé n'peux sénon penser qu' ch'est quâsi un sacrilège dé changi un langage tch'est si bé et si riche d'expression et sanctifié par sen ûsage dépis 1662. Ch'est un langage à part qué j'sommes accouôteunmés à faithe sèrvi pour pâler au Bouan Dgieu, mais tchi n'est pon quand mème trop difféthent du modèrne et qu' nou comprend tout à fait bein. Quand nou-s-étha à Li dithe. You à la pliaiche dé Thee che s'sa comme si nou-s-avait à s'écarter d'Li. Ch'tait pourtant eune affaithe d'ordgi pour mé d'pouver dithe à nouos anmins d'l'Églyise Romaine qué j'avions l'privilège dé Lé tutoyer dans l'Oraison Dominicale, eune chose êtrangi siez ieux!
Et criy'-ous qué v'la tchi s'en va attriotchi les jannes ès sèrvices dé l'Églyise? Jé n'lé crai pon! Pour ravigoter la bouane ville couôteunme d'aller à l'Églyise i' faut la disciplinne du temps pâssé quand les pathents accouôteunmaient l's êfants à y'aller des lus p'tits jours, et tch'i' y'allaient ieux-mèmes à la pliaiche dé s'lôvier sus l'sofa ou dans la grand' tchaîse à r'garder la télévision!
Et Moussieu Manton nouos ramémouaithe qu' un tas du troubl'ye dans l'monde est la siette dé l'abandon par l'Angliétèrre des Îndes, dé ses bâses généralement dans l'extrème et l'mouoyen Orient, du Canal de Suez, et d'La Méditérranée, et san repliaichement par les Russes tchi né d'mandent pon mus d'rêussi, sans lus battre, à rêaliser chein tchi n'était qu'un rêve pour ieux à travèrs des siécl'yes.
Tch'est qu' ch'est qu'un centre Communicare? J'vai tch'i' y'a un tas d'pâlement dans la lettre du mais mar du nouvieau Minnistre d'St. Brélade au sujet du chein tchi s'en va êt' bâti ès Tchennevais, et y'en a ieu d'pâle dans la gâzette étout. I' m'sembl'ye aver liu qu' la pâraisse dé St. Brélade s'en va contribuer vingt mille louis pour lé bâtisse, mais qué l'restant - disons huiptante mille louis - étha à êt' payi par l'Église Anglyicanne et la Congrégâtion Méthodiste!
J'peux bein comprendre qué le Wesleyens ont bésoin d'eune chapelle dans la contrée dépis qu'la cheinne dé Tabor a dispathu, et j'éthais 'té en faveur, si j'avais ieu rein à y faithe, dé la contribution d'la pâraisse pour lus aidgi à bâti ès Tchennevais, mais jé n'peux pon m'mett' dans l'idée pourtchi qu' l'Églyise Parouaissiale prend sus lyi d'trouver et dêpenser quarante mille louis (sa maîntchi dé huiptante mille louis) pour bâti d'tchi qu' ou n'a pon bésoin. Y'a un mangnifique bâtisse à côté d'san probytaithe et tout pres d'l'églyise et du chinm'tchiéthe, bâti par l'ênèrgie et l'entréprinse de Moussieu Balleine dé memouaithe respectée, tchi dait pouver subithe ès bésoins des assembliees d'conmités d'églyise, d's occâsions sociales et d'l' Êcole du Dinmanche. Ch'est à bein près seux qu' sa capacité n'est pon souvent faite sèrvi au combl'ye. Et comme j'l'ai méntionné d'vant, à ch't heu qu' tout l'monde cache un moto, la Baie d'St. Brélade n'est qu' à un quart d'heuthe d'autcheune partie d'la pâraisse. Pourtchi dêpenser quarante mille louis pour chârer un bâtisse, êlouangni d'l'églyise, tchi né s'sa probabliément fait sèrvi qu' par les habitants des neuves maisons d'à l'entou, car si les St. Bréladais en général né prannent pon la peine d'aller à l'Églyise Parouaîssiale i' n'prandront pon la peine d'aller à l'églyise ès Tchennevais auprès la preunmié fais tch'il' îthont par tchuthiôsité!
Félicitations és Recteurs dé St. Pièrre et d'St. Sauveux tch'annoncent les Priéthes du Matîn et du Sé dites dans lus églyises réspectives, et la sonn'nie d'la clioche pour avèrti les fidéles. Il' obéissent l'înstruction dans La Litourgie tchi dit : Les Prières du Matin et du Soir seront faites dans la place ordinaire de l'Églyise, de la Chapelle ou du Choeur. Dans l'entrétemps, y'a-t-i' tchique Recteu tch'a l'couothage dé r'quémenchi à sonner l'Angélus?
George d'La Forge
Viyiz étout: