Fort Lauderdale, Florida,
U.S.A.
Lé 25 dé mar, 1972.
Moussieu l'Rédacteu,
J'veins d'êrchéver la gâzette dé Jèrri du 13 janvyi, et j'l'ai liue dé A jusqu'à Z. J'sis tréjous affanmé pour des nouvelles de l'Île, et y'en a tout pliein dans chutte gâzette-là. J'm'attendais quâsi d'vaie qué L's Êtats avaient décidé d'allouangni la piste d'attèrrissage d'avions à l'aéroport à St. Pièrre, mais j'vai qu' l'affaithe n'est qu' sus l'tapis acouo pour lé moment - à mains qué v'la tch'a 'té décidé d'pis, car y'a dêjà pus qu' deux mais dépis la publyicâtion d'chutte gâzette-là.
La lettre dé l'Avocat E. H. Le Bro au sujet est bein întérêssante et à point. Tchi danmage tch'i' n'est pon dans L's Êtats, Moussieu L'Bro! Ch'n'est pon souvent tch'il êcrit des lettres à la gâzette, mais quand i' y'en a ieune ou vaut la peine dé liéthe. J'm'èrsouveins tch'il en êcrivit eune mangnifique entouorre la prison quand i' y'avait tchestchion d'en bâti eune neuve du tout, et l'temps tchi s'est pâssé d'pis tch'i' c'menchîdrent à creûser pour les fondations à La Mouaie, et tch'i' sé sont grées auve la vielle tout chu temps-là ouaithe tch'i' y'a ieu 4,197 cas d'vant La P'tite Cour l'année passée, m'fait penser qué l'Avocat L'Bro avait p't êt' raison! Dans touos les cas, quand j'pense au trafi d'Bieaumont, en ville dans l'êté, i' m'sembl'ye tch'i' s'sa nécessaithe d'êtablyi La P'tite Cour à La Mouaie à St. Brélade quand la neuve prison s'sa en allant. Autrément i' faudra qu'la vainne Black Maria, tchi porte les prisonnièrs à la Cour, sort au p'tit jour lé matîn pour et' en ville à dgiex heuthes!
J'tais bein 'content d'vaie qu' l'idée d'bâti un neu' talustre du Bel Rouoya à Bieaumont pour faithe eune neuve route a 'té abandonee pour à ch't heu. J'aimethais bein mus vaie la nouvelle qué L's Êtats ont passé eune louai pour rap'tichi l'nombre d'motos pèrmîns dans les routes dé l'Île, sustout en liésant tch'i' y'en étha chînquante du chent d'pus qu' à ch't heu par lé temps qu' mil neu chent huiptante-chînq nouos tchèrra sus l'co. Sans doute, j'né s'sai pon du rang des vivants à ch't êpoque-là, mais j'pliains bein les Jèrriais - s'i' y'en a d'restant en Jèrri en 1985 - tch'éthont à vivre parmi l'encombrément des rues dans chu temps-là.
J'tais surprîns d'vaie l'portrait des grôsses têtes dé la police salariée, en présence du Député Riley, à brûler l's êtampes des dés (fingerprints en Angliais) du condamné Paisnel et d'aut' personnes entréveues duthant les r'chèrches. Ichîn en Améthique ches êtampes-là sont considéthées êt' dé grande importance en cas d'appel ou d'nouvieau témouangnage tchi pouôrrait entanmer un nouvieau pròces contre l'âtchûsé. Et mème tout l'monde est encouothagi d'enregistrer s'n'êtampe dé dés dans les bureaux d'police, car ch'est un mouoyeu d'identificâtion tchi peut êt' d'utilité. Y'a longtemps qu' la meinne est enregistrèe à Washington. Ou fut prînse par les autorités quand j'tais en travas dans un chantchi d'construction d'navithes pour le gouvèrnément.
Y'a des choses pliaîsantes a vaie dans la gâzette. J'tais content d'liéthe, par exampl'ye, qué La Reine à gracieusement décidé de n'pon donner êffet à la pétition du Sieur Bieaumont dé dêjutchi La Danme dé Sèr dé san siége seigneurial. Ch'éthait 'té danmage dé la faithe lé faithe à s'n âge et auprès tant d'années d'sèrvice à san p'tit pays.
Et ch'tait pliaîsant d'vaie l'portrait d'cèrtaines danmes qué j'ai l'honneu d'connaître dans l'rapport au sujet d'la prèsentâtion du film d'l'Otchupâtion au cinnéma Forum. Et d'vaie l'portrait d'Moussieu Fraînque Pierrée à l'occâsion d'sa nominination comme directeur du Royal Trust Company du Cannada. Ch'est seux qué l' Royal Trust s'en va profiter de s'n'expéthience. J'vouos asseûthe qué si j'tais dans l'conmèrce jé l'nomm'thais comme iun d'mes directeurs étout!
Et j'sis content d'vaie qué Maît' Nelson Pallot est Chent'nyi d'St. Louothains. J'sis tréjous heutheux d'vaie un Jèrriais êlu dans la police dé sa pâraisse, et j'sis seux qué l'Sieur Pallot f'tha un raide bouon Chent'nyi.
Ch'est drôle dé liéthe qué les gens d'l'Île dé Malte sont trop pauvres pour démeuther en Jèrri! Comme les temps ont changi. J'tions quâsi touos pauvres ès Landes à St. Ouën quand j'vis l'jour là y'a eune huiptantaine d'années, et v'la tchi n'nouos empêchait pon d'y d'meuther! À ch't heu, i' pathaît tch'i' faut êt' riche pour aver ch't honneu-là!
Eune chose qué j'mé d'mande en liêsant la gâzette, est comment que l's'îndividus présentés d'vant Justice peuvent payi l's amendes împosées par les cours. Iun, par exempl'ye, est condamné à payi chent louis par La Cour Rouoyale. Un autre est condamné à payi trente-chîn louis par La P'tite Cour. Où'est tchi trouvent les sou pour payi d'itelles amendes? Faut'i' tch'i' y'en aie par les c'mîns en Jèrri, des sou.
George d'La Forge
Viyiz étout: