Ah ça, en pâlant dé p'tits faitchieaux, i' soulaient êt' bein contents si ch'est qu' nou lus m'ttait du lait frais pouor ieux à baithe. I' faîthaient étout la crème meûthi pouor qué l'beurre sé fîsse pus vite. Mais cèrtaines femmes avaient pus d'fouai à envyer eune pièche d'êtchu (en argent, bein seux) dans la selle à beurre. D'aut's dîthaient, dgia, sustout un deux-ch'lîn, à cause dé la crouaix d'ssus.
Les ptîts faîtchieux étout finnissaient d'l'oeuvre pouor les gens et pis, étout, i' r'trouvaient des chôthes et affaithes êdgithées ou pèrdues.
Si ch'est qu' ou les faîthiez mârri, par exthempl'ye en n'criyant pon en ieux, ou en lus jouant un mauvais tou - eh bein, i' ramâssaient des ronches pouor vouos êgrînflier atout. Ou bein, étout, i' pouvaient dêrouter vouos cartchuls. Et pis acouo il' avaient l'pouver d'empêchi les g'linnes dé pondre!
Mais, sustout, en ayant affaithe à ieux i' n'fallait en prendre ni compte ni taille - ch'est à dithe, tch'i' n'fallait pon les dgetter dé trop près, ni par chance les compter. Fallait les laîssi trantchil'yes.
Viyiz étout: