Les Pages Jèrriaises

La Fontaine ès Mittes



Nou-th'y'allait y qu'si dé l'ieau pouor lé ma à la veue, comme étout à la cheinne tch'est tout près, à l'êst - La Fontaine du Cré.

Y'a bein des sources ou fontaines dans l'Île tchi sont censées aver chu pouver d'èrfaithe lé mal ès yeux. Nou lavait sa veue dans dé l'ieau provenue dé telles fontaines. Et il y'a acouo cèrtaines gens tchi l'font d'nouos jours.

Quant à chutte fontaine, ès Mittes, ou 'tait aut'fais censée étout pouver faithe èrvaie l'th aveugl'yes et pis dé pouver faithe les muets pâler. Lé Mâjeur J. Hamptonne L'Amy dithait, dans san livre, "Jersey Folklore", qué l'ouïe r'vénait ès sourds, étout. Quant à nous, j'n'avons janmais ouï d'ité ès touos vièrs Trinnetais qué j'connaîssions pouortant hardi bein. En tout cas l'histouaithe qué l'Sieur L'Arny donne est tellement dêtaillie et complyitchie qué ch'la n'fut janmais raconté d'même par nouos vièrs. Et nou petit don rayi tout ch'la comme n'étant pon du folklore Jèrriais du tout!

La fontaine sé trouve en d'ssus du Rouoge Creux souos La Tête dé La Belle Hougue. Eh bein, y'a La Cave du Rouoge Creux étout, en d'dans. Et les pendiles en d'dans (les stalactites) 'taient censées êt' les touos preunmié lèrmes dé la Fée (du temps pâssé) d'La Fontaine ès Mittes, tch'est en d'ssus, et tch'avaient coulé l'travèrs à former les stalactites. I' n'fallait pon y jouôter des pièrres à l'th abattre; i' fallait les laîssi, car autrément la vèrtu, la bouonté, s'n îthait des lèrmes en d'ssus tch' formaient actuellement la r'source et la fontaine dg'ieau.

La Fontaine ès Mittes, don, 'tait aut'fais suppôthée faithe èrvaie l'th aveugl'yes, et pis dé pouver faithe les muets pâler, en outre d'aver l'pouver d'èrfaithe lé mal ès yeux.

La légende qué j'racontons ichîn est la véthitabl'ye comm-ej j'l'avions tréjous entendue dithe à bein des anciens à La Trinneté.

 

Un St. Ouonnais

 

Viyiz étout:

 

Les Pages Jèrriaises