Les Pages Jèrriaises

Les faîtchieaux dans lus d'vantchieaux

Les faîtchieaux dans lus d'vantchieaux
grénotent au mais d'Févri;
i' n'fait pon dgiêx fais trop caud
épis il' ont l'onglyie.

Un d'vanté n'garde pon caûffé
quand y'a un co d'fraid vent
il est d'mêtchi d'êt' aufait
pouor couôtre sén habilement.

Les faîtchieaux sont êffathués;
les faîtchieaux font d'lus tchian
et quand les clios s'sont tchéthués
i' s'sont là à l'avant.

Ch'est-i' atout du dgèrrue
qu'nou coud san bieau d'vanté?
Ou atout des belles-toutes-nues
qu'nou fabriqu'thait d'ité?

Ch'est en Févri qu'nou fabrique
les habits ès faîtchieaux
auve d's ailes dé vêpres et moustiques
nou s'attînfe dé bieaux-bieaux.

Mais Févri est un court mais
pouor ag'ver tout l'travas;
toute la natuthe qu'nou pliantait
en laîssant raîque d's ênas.

I' dêviêthont d's ithangnies
pouor la souaie qu'il' enfilent;
les gambes ès moûques à longs pids
lus sèrvithont d'êpiles.

Pouortchi qu'Févri est d'sèrté?
Les bouais sont ênâtchis;
les faîtchieaux ont raîque stèrté
d'èrfieilli not' Févri!

Geraint Jennings

 

Viyiz étout:

 

Les Pages Jèrriaises