Le Ménage ès Feuvres,
St. Ouën.
Lé 25 d'octobre, 1969.
Moussieu l'Rédacteu,
Nou tcheint acouo à bein des vielles crianches Jèrriaises, d's avèrtis, bouannes chances et mauvaises chances. Ch'est bein vrai, et nou peut dithe fiabliément tch'i' y'a acouo gentiment d'gens dans chu vîngtième siècl'ye tch'ont grand fouai dans tout chenna. Véthe, bein pus qu'nou n'pense! Pour d'aut' ch'est sans doute un tas d'niolîn, mais quant à ieux ch'est êvangile, comme nou dit: I' sont bein convaintchus d'la sagesse dé ches crianches.
J'vouos disais la s'maine passée qué l's anciens pendaient d'l'hèrbe b'nêt dans la maîson pour cachi les chorchièrs, et tch'i' y'a mème eune hèrbe appelée hèrbe d'chorchi ou d'la grand'hèrbe, mais y'a d'aut' sortes d'crianches entouorre ches mauvais sujets-là étout. J'mé r'souveins en aver liu tchitch'eunes dans les bulletîns d'L'Assembliée d'Jèrriais. Par exempl'ye, env'yer du sé dans l'feu empêche les chorchièrs d'aver du pouver. Y'en avait tch'en portaient, du sé, sus lus pèrsonnes contre la chorchell'lie, et s'il' avaient eune crainte qué tchitchun 'tait un chorchi et tch'i' pouvait p't êt' lus jouer un tou, i' s'maient tchiques pînchies d'sé en d'houors dé siez ieux, et i' n'lus pouvait rein. J'ai mème conne eune femme en Améthique tchi pèrdit s'n homme y'a quatre ou chînq ans, et sa vaîsinne en s'mit l'tou d'sa maison pour qué l'défunt n'vînsse pon la hanter! Lé temps passé nou pouvait faithe la mème chose contre les cheins tch'avaient eune rantcheune contre vous et tchi vous en voulaient. Et pis quand nou rencontrait un chorchi i' fallait touanner sa pouchette à l'envèrs pour n'êt' pon enchorchélés.
Cèrtaines gens s'maient du pèrsi en d'houors d'la grand' porte contre l'pouver des chorchièrs s'il' entraient. D'aut' disaient qué ch'tait pour les empêchi d'entrer. Y'a eune vîngtaine d'années un St. Jeannais m'dit tch'il en connaîssait iun, un chorchi, et qué chaque fais tch'i' l'viyait il êcopissait par dessus s'n êpaule gauche pour l'empêchi d'aver l'pouver d'lî jouer un tou. Et un St. Bréladais, homme dé bein et prîncipa d'pâraisse (i' n'y a pon bein d's années tch'i' n'est pus), m'affirmait tch'il en connaîssait iun tchi d'meuthait à La Mouaie et tchi y'avait empêchi ieune de ses vaques dé donner! I' m'dit tch'il avait dêfait l'tou en chèrgeant s'n arme atout d'la poudre et un douze sou et tithant l'douze sou par dessus l'dos à la vaque! Nou créthait qué ch'tait assez pour touanner les sens et cailli l'lait à la pouorre vaque, mais d'pis tch'i' put la traithe tout d'suite auprès, i' faut penser qué v'la tchi n'lî fit pon d'ma!
Bein du monde portaient du vif-argent dans eune pouchette ou l'tou du co, contre les chorchièrs et la chorchell'lie. D'aut' portaient du camphre, du blianc sé, ou d'la brüéthe. Nouos vièrs étout m'ttaient eune pétite boutilyie d'vif-argent dans eune bouaîte, ofûche, en d'dans d'la cheunm'née, pour empêchi les chorchièrs dé d'valer par là. J'ai ouï qu'nou-s-en trouve acouo tchiquesfais en dêmachonnant des vielles maisons. Quand l's anciens halaient tout l'lard dé d'ssus l'os d'palette dé couochon, ou toute la viande dé d'ssus l'os d'palette dé mouton, i' faîsaient un creux l'travèrs dé peux qu'les chorchièrs né l'changîssent en baté pour crouaîsi l'ieau!
Heutheusement, y'avait des crianches tch'étaient pûtôt bâsées sus la réligion, et l'Sîngne dé La Crouaix 'tait bein mus connu et fait sèrvi par l's anciens tch'i' n'l'est d'nouos jours. Quand i' s'en allaient fouângner l'lendemain, lé sé i' faîsaient la crouaix sus lé l'vain, auve un dé, et quatre pétits creux, deux à haut et deux à bas, pour èrprésenter La Crouaix et Les Clious - tout en r'citant en bas: Au nom du Père et du Fils et du Saint Esprit, fais l'ver lé l'vain comme Tu'as fait l'ver l'grain! Pour d'la gâche dé pâte i' faîsaient la crouaix sus la pâte. Quand j'vais en France, j'ai r'mèrtchi qu'les gens font l'sîngne dé la crouaix sus un frais pain d'vant l'entanmer. Et, comme ou l'savez probabliément, l's autels dans nouos églyises ont quatre crouaix, ieune dans châque cârre, creûsèes dans la pièrre tchi fait la tabl'ye, et ieune dans l'mitan, quâsi en d'vant, r'présentant les quatre bliesseûthes dans les mains et les pids d'Notre Seigneur sus La Crouaix et la cheinne dans San côté. Quand l's autels sont en forme d'eune tabl'ye en bouais, la Belle nappe bien blanche tchi la couvre - comme il en est ordonné dans La Litourgie pour la célébration d'La Sainte Cène - a les chîn crouaix brodées d'ssus.
J'm'èrsouveins, étout, qué quand ma m'mèe dêcomptait l's orians atout sa bague dé neuches, en faîsant L'Sîngne dé La Crouaix neuf fais sus l'y, ou dêcomptait en mème temps. Y'en avait tchi dêcomptaient en Français et d'aut' en Latîn, mais jé n'sai pon tchi langage qu'ou faîsait sèrvi car ou l'faîsait en bas.
Nou peut don dithe qué l's anciens avaient fouai dans L'Sîngne dé La Crouaix tch'avait 'té mèrtchi si solonnellement sus lus front dans l'Baptème au tout c'menchement d'lus vie!
George d'La Forge
Viyiz étout: