La Fête Nouormande fut d'èrtou siez nous du 23 au 30 d'Mai 2005. Ch'est la pus grande et la miyeu célébrâtion d'not langue et d'not' tchultuthe, et des langues et tchultuthes dé Dgèrnésy et d'la grand' tèrre.

À la cauchie et à l'aéroport d'Jèrri, nou vait chu m'sage êcrit sus les portes : “Séyiz les beinv'nus à Jèrri”. Ch'tait don vraînment un pliaîsi pouor les Jèrriais d'pouver faithe la beinv'nue à touos les cheins tchi lus en vont prendre part dans la Fête Nouormande en 2005 en Jèrri.

Ouaithe qué l's Îles et la grand' tèrre saient s'pathées par tchiques kilomètres dé mé et huit chent ans d'histouaithe, jé chârons eune tchultuthe Nouormande. Y'étha d's èrcitâtions et chansons en Jèrriais, Dgèrnésiais et Nouormand d'la grand' tèrre - et d'la dans'sie, d'la mûsique, des couôteunmes et des gammes. Ch'est tréjous un pliaîsi d'vaie toutes les difféthentes costumes des participants! Un tas d'fanne pouor les jannes et les vièrs !

Y'avait étout un tas d'aut's activités: des fricots - des mèrvelles, du pain, du cidre, d'la biéthe, du thé, du vîn.

En 2005, j'fêtînmes les Rouaisouns auve nos parchonnièrs d'la Sociêté Rouoyale Agricole dé Jèrri à lus centre à La Trinneté.

Et duthant toute la s'maine dé d'vant y'avait des présentâtions en Ville, d'la poésie, d'la beusquéthie et j'fînmes braithe les peîles!

Lundi l'23 d'Mai

Lanch'chie d'eune s'maine dé Fête (5h30 du sé) à La Société Jersiaise a publié l'nouvieau Dictionnaithe Jèrriais-Angliais pouor lé lanchi duthant la Fête)


Mardi l'24 – Jeudi l'26

D'la promotion d'la langue dans les conmèrces d'la Ville et dans d'aut's pliaiches.

        Dans les rues d'la beusquéthie (chant'tie, r'citâtions, sonn'nie d'bachîns)

        Deux prom'nades dgidées poétiques et historiques (proposées par lé Tourisme dé Jèrri)

        Mouontréthie entouor la langue à la Maîson d'Nouormandie.
        Mouontréthie d'livres en Nouormand à la Société Jersiaise.

Vendrédi l'27

Dans l'arlévée – dans'sie en Ville dans les rues pavées, chant'tie, musique...

        Au sé, pathade en costeunme auve des couleurs Jèrriaises, Dgèrnésiaises, Nouormandes, des associâtions, étc – suivie par un vîn d'honneu (à la Salle Pârouaîssiale d'St. Hélyi)

Sanm'di l'28 – Lundi l'30

Trais journées à La Trinneté.

Ch'tait la Fête d'la Campangne d'la Sociêté Rouoyale Agricole dé Jèrri, et La Fête Nouormande 2005 'tait l'attraction tchultuthelle (y'avait étout des mouontréthies d'bêtes, vaques, étc., d's artisans, des stâlles, mangi, baithe.....)

Pouor les présentâtions:

Dans la grand' tente: lé progranme traditionnel d'èrcitâtions, chansons, pièches. (Oblyigatouaithement: Ma Normandie, Man Bieau P'tit Jèrri, Sus la Mé, Sarnia Chérie)

Y'eût un sèrvice en Jèrriais l'Dînmanche à méjeu avant lé c'menchement du progranme d'èrcitâtions et présentâtions. Coumme en 2002, l'églyise Méthodiste offrit eune chapelle.

La stâlle ès livres

Coumme en 2002, y'avait eune stâlle ès livres pouor les participants d'la Fête Nouormande.

Y'eût un souper à La Trinneté l'Sanm'di au sé auprès la freunm'thie d'la preunmié journée.

Livret d'pièches

Lé livret 'tait à acater siez La Société Jersiaise et l'Centre des Arts. Duthant l'weekend, ch'tait à vendre dans la grand' tente.