Les sîngnes du zodiaque
Taurus
Lé Touauthé
lé vîngt'tch'ieunième d'Avri au vîngt'tch'ieunième d'Mai
|
Lé jour chanceux: |
Vendrédi |
|
Les neunméthos chanceurs: |
six et quat' |
|
La pièrre d'naîssance: |
l'emeraude |
|
La couleu: |
bliu et lîlas |
|
Les dangièrs: |
Des situâtions difficiles auve l'amour et les sou |
Les touauthieaux sont d's entrinneurs: innutile d'ardgumenter auve ieux. Il' ont la pèrsévéthance pouor faithe lus c'mîn dans la vie. I' faut pèrsévéther pouor rêussi, et les touauthieaux s'en vont rêussi: bâti des maîsons, et des villes, fonder des compangnies, et tchultiver la tèrre.
Les touauthieaux aiment la pèrmanence. Il' aiment chein tch'est confortabl'ye et tchi n'change pon. Il' aiment la pèrmanence dans l'amour, dans lé mathiage, dans la maîson et dans l'mêtchi.
Il' aiment la pèrmanence donnée par les sou et la stabilité finnanciéthe. Il' aiment lé luxe: des choses vaillabl'yes, les bieaux objets, lé bouan fricot, les vîns, les bouans restaurants.
Les touauthieaux aiment les couleurs et la musique, la bieauté et l'amour.
Coumme l'annima d'lus sîngne, les touauthieaux peuvent montrer eune grande coléthe, mais autrément i' sont calmes et pâcients.
Lé co et la gorge sont souos l'sîngne du Touauthé: les touauthieaux en généra ont d'belles vouaix pouor chanter et pâler, mais i' peuvent êt' afflyigi des fraids, d'ma la gorge, et du gouaître.