Les jeunmieaux sont plieins d'nouvelles idées. I' sont tchuthieurs, întelligents et aiment la communicâtion. I' veulent jouer tchiques rôles difféthents dans la société.

I' veulent pus dg'iun dé tout: djobbes, amouotheurs, întéthêts. I' chèrchent tréjous d'nouvelles idées et expéthiences. I' n'ont pon d'concentrâtion et laîssent lus projets lé pus souvent sans les finni.

Lé sîngne des Jeunmieaux est l'sîngne dé la communicâtion: les jeunmieaux aiment êcrithe des lettres; il' aiment pâler auve d's êtrangièrs, et il' adouothent lé téléphone, lé fax et l'e-mail.

Les jeunmieaux sont d'bouans vendeurs: i' peuvent vendre des vaituthes, des sèrvices, du doubl'ye vitrage. I' savent pèrsuader et explyitchi. Mais lus faiblièche est la supèrficialité: i' prannent les nouvelles idées et la nouvelle înformâtion sans janmais approfondi lus connaîssance. Pouor les jeunmieaux, la preunmiéthe împression est tout.

Les jeunmieaux peuvent travailli dans l'thiâtre ou la télévîsion. Il' aiment lé fanne et les gammes.

Il' aiment la libèrté et lé changement. I' veulent viagi, sans p't'êt' janmais arriver. I' sont coumme des papillotes: i' volent dé flieur en flieur.

Les mains, les bras, l's êpaûles et les ponmons sont souos l'sîngne des Jeunmieaux. Gard'ous d'la courte-haleine!

• Lé B'lîn

• Lé Touauthé

• La Crabe

• Lé Lion

• La Vièrge

• La Balanche

• Lé Scorpion

• Lé Sagittaithe

• Lé Capricône

• Lé Vèrseux

• Les Paîssons