Les sîngnes du zodiaque
Sagittarius
Lé Sagittaithe
lé vîngt-traîsième d'Novembre au vîngt'tch'ieunième dé Dézembre
|
Lé jour chanceux: |
Jeudi |
|
Les neunméthos chanceurs: |
chînq et sept |
|
La pièrre d'naîssance: |
la turquêsse |
|
La couleu: |
pourpre |
|
Les dangièrs: |
lé feu, l's explosions et la jalousie |
Les sagittaithes sont ênèrgiques, ambitieurs, génétheurs et ouvèrts ès nouvelles idées. Il' aiment la libèrté et i' sont optimistes.
Les sagittaithes sont chanceurs: i' sembl'yent êt' tréjous dans la bouanne pliaiche au bouan moment.
Lé sîngne du Sagittaithe est un sîngne dé feu, et coumme lé feu, les sagittaithes changent sans èrpos. I' sont hardi îndépendants et aiment l'aventuthe et l'changement d'pâtuthe. Il' aiment viagi et chèrchi la sâgesse. I' sont philosophes et explorateurs.
I' n'aiment pon êt' lié pouor longtemps auve tchiqu'un d'aut': lé profond amour n'est pon pouor les sagittaithes. Mais il' aiment l'amiêtchi: i' font d'bouans anmîns. Dans tout lé zodiaque, ou n'trouv'thez janmais un miyeur anmîn qu'un sagittaithe. Les sagittaithes sont génétheurs et gentils, compliètement sans malice, et i' font des faveurs tout lé temps pouor l's aut's.
Les sagittaithes aiment la libèrté pouor ieux-mêmes, et i' l'donnent ès aut's. I' n'sont pon jaloux et i' n'sé mêlent pon dans l's affaithes d's aut's nitout.
Il' ont un bouan sens d'heunmeu, et i' y'a hardi d'sagittaithes tchi sont des auteurs ou tchi travâlent dans la publ'yicâtion, la télévîsion, lé radio ou la communicâtion.
I' peuvent ristchi, mais i' sont honnêtes et francs.
Il est bein aîsi d'aimer un sagittaithe, mais i' sont oublieurs et assèz pièrcheurs. Mais auve lus charme, les sagittaithes peuvent tréjous rêussi.
Les tchiêsses, les hanques et la faie sont souos l'sîngne du Sagittaithe. Les sagittaithes peuvent êt' afflyigies par l'alcoolisme. I' daivent faithe bein d'exèrcice physique pouor rester en bouanne santé.