Man pouôre Elie! Tu t'pliens d'l'ingratitude des Jerriais! Tu n'os pâsle des siens qu'ont fait servi tes piéches sans dithe 'mercie'; et tu nos conte la scène du pouôre mêdjan qu'eut à contribuer à la collecte à eunne séthée ou-ès qu'nous 'tait à r'citer des versets qu'i' lus avait dounné pour rin!
Mais j'ai veu oquo pus fort que chounna, mé! Ch't'ait, y'a tchiq' années, pour un Tée d'Escole du Dimanche d'eunne Chapelle pas lien d'la Hougue Bie. La congrégation n'pouvait pon fourni assez 'd'vans'; ch'est-tant-tchi y'un des Sequestres s'en fut d'mandé à san couôsin, houmme d'Eglyîse, si y'en 'tait d'rin, pour l'oblyigi, d'lus prêté sa 'van' pour le jour.
Pour oblyigi san couôsin, l'houmme d'Eglyîse dit qu'oui d'ja! L'travas qu'il avait termié pour chu jour la fut dèsmîns, san fi'n resti en viellottes, et 'van' et valét fûtes enviés à la Chapelle, et de d'la quazi l'tou d'l'Ile, chérgis d'monde. Quand vint l'sé, y'eut un Tée. L'valét dèslyi san ch'va, lis dounni un fagot d'fi'n qu'il avait apporté, et s'en fut s'assiéthe au Tée avec les autres. A peine assis: "Avous un titchét?" qu'nou lis d'mandi. "Nennin! qu'i rèspounni. Eh bin, ch'est un sh'ling!" Et m'n'houmme d'Eglyîse, qu'avait prêté houmme et 'van' à un Tée d'Chapelle et néglyiji un jour de travas, eut à remboursèr le sh'ling à san valet, à faithe r'féthé san ch'va, et à l'laissi deux jours dans l'èstablye à se r'pôsé! Au jour d'annièt, persounne n'y'a oquo dit mercie! Ch'est coumme j'té l'dit: Nous à travaillyi pour eunne bouonne OEuvre (avec un grand O) et ch'est autant d'halé pour la Cause (avec un grand C) qu'nos amins s'ent'disent en riant.
J'les counnaissons bin!
Piteur Pain.
Viyiz étout: