Les Pages Jèrriaises

Ma justification


Si j'té r'pl'yique
Dans la Chronique,
N't'en êtonne pas, mais dis mé don, J.P.,
Pourtchi qu'chonna t'affl'yige si ch'est qu'parfais,
En prenant un crayon, j'm'abuse à ma monièthe
Et j'fais rimer tchic lignes... Ma fé! nou peut faithe plièthe!
Eche don ma faute à mé, si j'vé l'côté comique
D's'articl'yes si sérieux qu'nou lièt dans la Chronique?
Et jé n'mé doutais pas qu'man pouorre èscrivachin
S'n'allait t'forchi, J.P., à plieuthotté d'chagrin!

Car vé tu?
C'h'est bain du,
Si faut tréjous êcouter tout ch'qui s'dit
Et digéthé tout chein qu'd'autres ont êcri
Sans desserré les dents, coumme si nou-s'tait faits d'chithe,
Et qu'la fache vos romp'rait s'ou z'êprouvètes à rithe!
Faut-i tréjous rester coumme autant d'êtamperches,
Qui dêtestent l'bouan fun et qui jamais n'en cherchent?
Fait lé s'tu veurs, J.P., mais j'aime mus, pour de mé,
Etibotchi pour rithe, que d'faithe un gros musé.

Elie

 

Viyiz étout:

 

Les Pages Jèrriaises