À Portinfé,
Saint Ou.
Moussieu l'Editeu,
"Ch'est bein drôle, Ph'lip," la Merrienne mé dit hier au sé, "que quand nou-s-a des r'frédeuses ch'est tréjous ouèsqu'i' font l'pûs d'ma. J'en ai yunne à l'ouothelle gauche, et pourtchi pas l'ouothelle drouaite? Et j'en ai une autre sûs le p'tit ortet d'man pid drouait. Pourtchi pas man pid gauche? Mais, gauche ou drouait, i'm'font grand ma. Tchi chance qu tu'as de n'en aver pas!".
"Et tchèsqu'i' t'a dit que j'n'en ai pas?" j'li d'mandis.
"Parsque tu n'te pliains pas."
"Oh, est'che'là tout?" je m'fis, "Eh bein, dépis qu'tu veurs saver, j'en ai yunne tchi m'fait grande ma."
"Oh, bon!" ou s'fit, "et ouèsqu'oulle est?"
"Méle-té de tes affaithes," j'li dis, "car je n'voudrais pas t'dithe. Mais chennechin je peux t'dithe que j'la vendrais à bouon marchi."
"Et mé les mennes étout," ou dit, "mais j'crais que je n'trouv'thont pas d'ach'teurs. A ch'teu, Ph'lip, i' pathait que tout va bein à Saint Piêrre. Les nuages ont dispathu pour lé temps."
"P't'être pas tout à fait," j'li dis, "car i' pathait étout que nou pouorrait vaie une êlection là pour protchutheux."
La Merrienne dit qu'ou n'savait pas que y'avait une vacance.
"J'n'en si pas seux," j'li dis, "mais n'ou m'a dit que y'en a yunne, et l'Sieur Vautchi n'peut pas bein rester tou-seu, car il en faut deux. La rumeur couort que l'Frainque Trachy se met candidat, et que y'en étha un traisième. Quant au Frainque Trachy, s'il avait 'té independant, ch'est seux et certain tch'il éthait 'te Connêtablye y'a longtemps, mais sa djobbe siez Le Gallais a tréjous empêchi chonna. Ch'est dommage, pourtant."
"Lé Sieur L'Gallais n'éthait jamais voulu le laissi aller," ou s'fit. "N'ou n'trouve pas d's hommes comme lé Frainque touos les jours. Mais, laissant chonna d'côté pour tchiques instants, Ph'lip, i' pathait que l'diné d'la Municipalité en Ville fut un grand succès. Lé 'Taff' L'Cappelain, fit-i' un bouon discours?"
"Ni bouon, ni mauvais," j'li dis, "pour la bouonne raison que ni li ni sa femme étaient là. Tu vé, Merrienne, i' n'est pûs membre d'la Municipalité, et i' n'pouvait pas bein être invité."
"J'en ai r'gret pour sa charmante femme," ou s'fit. "Ou 'tait si je n'me trompe pas, la fille à 'Douard Helleur, yun des miyeu titheurs au blianc que Jêrri avait dans chu temps-là. Ou 'tait yunne des pûs belles filles quand ou mathyit l' 'Taff'."
Ch'est drôle assez, Moussieu, mais i' semblye que toutes les s'maines y'a tchiquechose à dithe d'la pâraisse d'Saint Louothains et du John Baudains. La Merrienne m'encouothage, car oulle a une grande admithation pour lé John.
"Chais l'miyeu de touos nos Connêtablyes," ou s'fit, hier au sé, "car i' fait tréjous comme l'veur et n'prend d's avis d'personne."
"Même, i' n'veur pas s'laissi dguider par l'Assembliée d'Pâraisse," je r'mertchis. "S'ou li dit d'faithe tchiquechose, il êcoute et fait l'contraithe. En un mot, i's'fiche du monde."
"Et pourtchi pas?" ou s'fit "Il est vrai que hardi des p'tites routes sont en mauvais état, mais tandis que l'rât n'hauche pas il est satisfait. I'faut dithe, étout tch'il est tréjous supporté par lé secrétaithe, le George Bertram."
"J'pouôrrais p't'être dithe tchiquechose sûs chu point-là," je m'fis, "mais aussi bein m'taithe, car j'si seux qu'tu n'en approuvthais pas. Tu'as tant d'amiêtchi pour Saint Louothains et tout ch'qui y'appartchent que j'ne s'sais jamais surprint d'entendre que quand tan temps veindra, tu voudras être ensév'li dans l'chim'tièthe là, aupi de l'eglyise, et tout près d'un tombé à tchique Baudains."
"J'n'ai pas ocquo décidé," ou dit, "mais ch'n'est pas pour dithe que je n'y'ai pas pensé. Enfin, man Ph'lip, si tu'as l'idée que j'm'en vais m'en aller pour té laissi libre de te r'mathier à tchique hardelle de djais-huit à vingt ans, tu t'en vas être desappointé, car j'n'ai pas idée de t'laissi faithe chutte bêtise-là ocquo. À ch'teu, tu m'avais dit que d'vant long y'éthait une êlection partout l'Ile pour un Sénateur. Tchèsqu'en est?"
"A ch'teu que l'Baillyi et l'Député Baillyi ont 'té assermentés," j'li dis, "la position est pûs cliaithe. Je m'attends d'un jour à l'autre d'ouï que l'Peter Crill d'veindra Avocat-Général, et si ch'est d'même, i' faudra sans doute, un Sénateur pour l'rempliéchi. Y'a des rumeurs que y'étha au mains trais candidats, lé Député Venables, lé Député Dupré et lé Député Tomes. J'avais comprint que y'éthait p't'être étout un candidat d'la Campagne tch'est bein connu, mais n'ou m'a dit tch'il a abandonné l'affaithe."
"Et des trais que tu'as nommé tchèsqu'tu crais qu'a la miyeu chance?"
"Je n'voudrais pas gagi," j'li dis, "mais l'Député Tomes dév'thait en appréchi. Ch'n'est pas pour dithe tch'il est seux d'y v'nin, mais n'ou n'peut pas oublié tchèsqu'i' fit à la draine êlection pour Députés d'la Ville."
La Merrienne réfléchit un mio épis ou me d'mandit si j'pouvais li dithe dé ouèsque chutte fanmille-là v'nait. "Car," oulle ajouôtit, "ch'n'est pas un nom Jêrriais."
"La fanmille Tomes d'meuthent à Saint Jean," j'li dis, "et j'comprends tch'i' vintent en Jêrri pour travaillyi ès carrièthes à Ronez. Ch'est, sans autchune doute, des gens r'merquables, et nou peut vaie chonna par chein tch'ils ont fait. Nou-s-en r'ouïtha pâsler d'chais Tomes à l'av'nin. A ch'teu même s'i' n'ont pas un bouon vièr nom Jérriais comme, par exemplye, Lé Cornu ou Perchard, nou n'peut pas dithe que ch'est d's êtrangiers."
"Nan," ou s'accordit, "mais, Ph'lip, j'si pûs intérêssie dans les patates. J'ai liut dans la 'Post' qu'un 'Marketing Board' s'en va être êtablyi chutte saison. Est'che la fin du troublye?"
"Grand doux, nennin, Merrienne!" j'li dis, "ch'n'est qu'un qu'menchment. Quant à mé, quand j'éthai un viage pour la Ville, j'm'en ithai tout drait au 'Bridge' et fiche du 'Marketing Board'! Et y'en étha tout-plien d'autres comme mé. Quand nou-s-a d'la marchandise, ch'est d'la vendre aussi vite que pôssiblye au pûs offrant, et fiche du restant!"
"Mé étout," ou dit, "pour bein qu'n'ou trouve des ach'teurs."
"Ne t'gêne pas," j'li dis, "y'en étha.
Ph'lip
Viyiz étout: