|
Rouget, Binet ou Pigeonnet, Rom'thie, Caplyi ou Mâsuri, Côtard, Têtard ou Pain-saucé, Pomme dé suthet chantait ainsi: J'éthais voulu dès qué j'fûsses meûthe, faithe ma forteune aussi solide, à maîntchi d'or, à maîntchi duthe, comme mes couôsîns des Hespérides. J'éthais voulu vivre en amour, êt' pour Adam la Défendue, pour un Berger la Belle d'un jour ou la Vénus à maîntchi nue. J'éthais voulu qu'eune arbalète par lé mitan m'ait adèrchie. J'éthais voulu sauver la tête du fis du péthe, du Saint Esprit. J'éthais voulu faithe la tchulbute un co qu'en d'ssous passe un Newton. Qu'à maîntchi brave il eusse dit: Boustre! et même houâlé: Y'a d'l'attrait don? ...Mais n'en v'là don qu'un gros preinseu la prend, la plie et la pép'tonne. J'ouïyons les pas du j'va peineux, lé grain d'la reue tchi la ramonne. Mais n'en v'là don qu'un fort amet l'êteint, l'êtrangl'ye et la mînchit. J'ouïyons les cris des p'tits rivets et les grînch'chies du vilain vis. L'cidre est sèrvi, san goût pitchet n'a pon pitchi des p'tites dgèrdgettes. I' coule ava comme un didget, i' n'est pon fait pour les chitchettes. Ch'est du tchoeuthu, ch'est du fou-bas, du doubl'ye mêgue en doubl'ye pînte. Ch'est du quatorze et ieune à Dgiâ, comme tchi dithait d'la puthe absînthe. ...Flieur si jolie du Paradis, drannet des songes et des sémenches, lé temps s'en va tchi tout dêtruit mais l'pépîn reste et tout r'quémenche; l'gôsyi d'acyi tchi bait si dû n'a pon tchitté les Hespérides: ta prêt'tie d'jouaie n'est pon pèrdue, dors-té ma pomme au fond du cidre!
Mariane de Bondy |
Viyiz étout: