Ch'est mus d'patchi ses valises qué d'patchi ses vailes, et en Êté y'a bein des gens tchi pâssent des heuthes à patchi et r'patchi lus bagages à seule fîn d'aver toute la pouque pouor lus vacanches.
Temps pâssé nou-s'avait des côffres dé bord pouor viagi, épis des valises en tchui ou en carton. Mais achteu quand nou r'garde les pouques tchi pâssent sus l'convéyeux dans la salle d's arrivées à l'aéroport nou vait des pouques en nylon dé toutes les couleurs auve des strapes et des zips et des cheintuthes et des pouchettes et des compartîments.
Lé viageux d'aujourd'aniet a un grand chouaix dé pouques à dos et d'bagages pouor transporter des p'tits compiuteurs, des poutchettes pouor les joueurs d'CDs, les caméras et les caméras d'vidgo et toute la machinn'nie qu'i' nos faut pouor bein s'rêjoui hors pays.
Ah mais, tchi train à la douanne quand i' faut chèrchi les bagages! À ches drein, j'tais à viagi et nou m'arrêtit à seule fîn d'chèrfouoilli dans ma pouque à dos pa'ce qué nou-s'avait êpié d'tchi tchuthieux duthant l'x-raiethie. Lé pouôrre douannyi eut à dêlachi les lachets, dêstraper les strapes et dêziper toutes les pouchettes pouor trouver chein qu'i' chèrchait. Nou-s'èr-x-rayit ma pouque, et la p'tite machinne-chouette mystéthieuse 'tait acouo là muchie tchique bord dans la pouque. Enfîn, en èrchèrchant dans touos les pouchettes et compartîments l'douannyi halit eune p'tite clié à siêx côtés pouor ma bike qué j'avais compliètement oublié.
Véthe, lé chein tchi chèrchétha, trouv'tha – mais l'chein tchi paqu'tha pouôrrait y trouver pus qu'il éthait pensé!
Bouôn viage!
Geraint Jennings
Viyiz étout: