Jé n'sis pon eune raide bouanne couque. La tchuituthe, pour dé mé, n'est pon aîsie ou eune forme dé dêlâssement. D'pis longtemps nou-s'a tâchi dé m'amender. Pour man vîngt-tch'ieunième annivèrsaithe grand'manman Hamon m'donnit un livre d'èrchettes dé Marguerite Patten.
Mais quand j'fis des crêpes lé Mardi Gras y'a tchiques années, tch'est qui s'adonnit? J'donnis, comme dé couôteunme, la preunmié crêpe dé d'dans la câssetrole à man tchian Sweep. Mais chutte fais-là i' l'êcopit en dêgoût ouaithe qu'il eûsse faim. Hé, n'y'a pon d'tchi rithe, valet!
J'pensais bein qu'j'avais un p'tit problième. Comme tchi qué j'pouôrrais l'faithe pus aîsiement? Bein seux qu'i' y'avait lé livre à grand'manman!
Mais pourtchi dgiâtre qu'les èrchettes dithent iun ou deux oeufs? Tchi difféthence qué v'là tchi fait? Jé n'comprends pas du tout. Mais s'lon la Missis Patten, i' faut ches îngrédgiens: quatre onches d'flieu, deux oeufs, eune d'mié-tâssée d'lait et dg'ieau, eune d'mié-pînchie d'sé, du beurre, des lînmons et du blianc chucre.
Preunmiéthement j'mîns d'la flieu dans eune bolle. J'crutchis deux oeufs et dêmêlis la flieu auve l's oeufs. Épis j'ajouôtis l'lait et l'ieau, et l'sé. Et j'laîssis tout pouor un p'tit brîn avant d'fricachi mes crêpes dans eune câssetrole beurrée.
Auve du chucre et du jus d'lînmon, les crêpes avaient l'goût d'èrva-s-y!
Ch'est la fîn tchi couronne l'oeuvre et lé lend'main au sé Sweep pointait san nez au frigo, excité comme eune pannelée d'souothis. à seule fîn dé m'ramémouaither qu'i' y'avait acouo d'la farce dé restant.
Angela Le Pavoux
Viyiz étout: