San Antonio,
Texas, USA.
Lé 11 févri, 1978.
Moussieu l'Rédacteu,
Mafîngre, lé porteux d'lettres m'a 'té bouan chutte sémaine! I' m'a apporté les gâzettes du 18 dé novembre et du deux d'dézembre. Les nouvelles dédans sont vielles, mais dépis qu'ch'est des nouvelles dé Jerri i' sont tréjous les beinv'nues. Dans la gâzette du 18 dé novembre j'vai qué lé havre pour les yachts à La Collette fut hardi endommagi par la tempête. I' m'sembl'ye qué tchique avârie d'même avait 'té prédite par tchitch'un tch'êcrivit dans la gâzette dans l'temps tch'i' fut décidé d'bâti l'havre la, dîsant qué ch'tait trop exposé ès vents d'ouêst en cas d'tempêtes. Appathemment il avait raison. I' faut espéther tch'i' n'faut pon bâti eune aut' caûchie pour sèrvi dé "brise-lames" au havre, eune affaithe tch s'sait sans doute bein couôteuse.
J'sommes à aver un hivé tch'est pus sévéthe qué d'habitude. Man fréthe tchi d'meuthe à Ottawa au Cannada mé dit tch'i' sont ensév'lis par l'êpêceu d'né la-bas, et ch'est la meme boutique dans l's Êtats du nord dé l'Améthique. Un tas d'êcoles sont freunmées, parties des villes sont sans veues ni êlectricité, et un tas d'routes sont plieines dé motos arrêtés et couvèrts dé né et plusieurs pèrsonnes ont 'té g'lées à mort dédans dévant pouver êt' dêcouvèrts. La Milice a 'té mobilîsée pour aîdgi à clièrgi la né car les tchéthues ("snow ploughs") né peuvent y suffithe, et l'Gouvèrnément à Washington est à aîdgi finnanciéthement. Ichîn, dans l's Êtats du sud, jé n'souffrons pon d'même. Lé temps est pûtôt fraid, dîsons eune mouoyenne dé 40 dégrés Fahrenheit ches jours, et deux d'goûts d'plyie d'temps en temps. Mais l's habitants trouvent ch'la fraid viyant tch'i' sont accouôteunmés à vaie l'solé et d'la chaleu presque touos les jours.
En liêsant la gâzette nou n'peut sénon êt' frappés par la gourmandise des gens en général pour les sou. Tchi trains entouôrre la prînme dé Noué pour les pensionnièrs! Ch'est bein întérêssant d'liéthe les débats dans L's Êtats au sujet. J'tais ravi d'vaie tch'i' y'avait la maîntchi des membres en faveur. Mais j'tais content d'vaie qu'l'aut' maîntchi avait assez d'avis - et d'couothage - pour voter contre. Ou-s-allez p't-et' craithe qué j'sis stégrîn d'penser d'même, mais j'ai 'té êl'vé à la vielle mode à St. Ouën dans l'temps qu'les gens criyaient qué ch'tait eune honte d'êt' sus la pâraisse. Dans chu temps-la, même les pus pauvres êprouvaient à mett' deux sou d'côté pour lus vièrs jours, et les jannes sé faîsaient un d'vé d'souangni d'lus anciens au bésoin. A ch't heu? Ch'est eune affaithe d'èrchéver autant qué possibl'ye. Et quand nou vait la prospéthité d's aubérgistes nou peut vaie où'est qu' hardi d'sou lus trouvent à la fîn d'la s'maine.
La chose tchi m'frappait l'pus en liêsant l'tîntamarre dans L's Êtats est l'fait qu'les Connêtabl'yes donnent tout pliein dé s'cours ès cheins tch'en ont bésoin, pon seulement à Noué mais duthant toute l'année, dans lus pâraisses, et qué si l'publyi a à payi eune prînme dé Noué à touos les cheins tchi r'chévent eune pension, i' s'sont à en payi à un tas tchi n'en ont pon bésoin. Et i' n'faut pon oublier qu' ch'est les sou des contribuabl'yes tch'i' sont à dêpenser.
Si les travailleurs, tchi voulaient lus assemblier en genre dé protêt dans l'Vièr Marchi pour gêner les Membres d's Êtats, donnaient les gages tch'i' pèrdent en faîsant d'ité, pour lé bénéfice des pauvres honteux, il' éthaient pus d'avis qué d'êcouter ès cheins tchi l's avisent à faithe dé lus tchian et s'montrer dans l'Vièr Marchi! Mais y'a-t-i' telle chose qu'un pauvre honteux d'nouos jours? Si oui, i' m'sembl'ye qué ch'est d'sa faute dépis qu'les Connêtabl'yes sont prêts à lî donner s'cours.
J'vais qu'la tchestchion d'protégi la Baie d'St. Ouën èrest sus l'tapis, et j'mé d'mande pourtchi qu'un tas d'Angliais sont sus l'conmité du "St Ouen's Bay Protection Campaign" à la pliaiche dé vièrs St. Ouënnais. J'vai rein qu'deux noms Jèrriais - Carré et Falla - d'mentionnés. Mais pourtchi protégi la Baie d'St. Ouën? La protégi contre tchi? Empêchi la mathée d'fonctionner? Ou est-ch' protection contre eune fliotte dé navithes dé dgèrre dé France tchi voudraient d's'embèrtchi des soudards pour la contchête dé l'Île?
Si autcheune contrée a bésoin d'êt' conservée, ch'est la contrée des Mielles tch'i' faut entréprendre. Et i' faut s'asseûther qu'ch'est consèrvâtion et pon conmèrcialisâtion qu'les consèrvateurs ont dans l'idée. Et i' n'est pont bésoin d'nommer un tas d'êtrangièrs sus l'conmité d'entréprînse. Y'a d'vièrs St Ouënnais tchi sont consèrvateurs d'esprit et d'la pouchette, et tch'ont eune bouanne tête sus l's êpaûles et du paids dans lus manches, et tchi savent qué La Route des Mielles n'est pon "Five Mile Road" et qué La Mathe au Seigneu n'est pon "St. Ouen's Pond" pour saver tchi faithe pour consèrver Les Mielles.
George d'La Forge
Viyiz étout: