Les Pages Jèrriaises

Un drôle dé Pèrrot!

un pèrrot

Le Ménage ès Feuvres,

Lé 29 dé juillet, 1965.

Moussieu l'Rédacteu,

Nou s'abûsait du mus qu'nou pouvait quand j'tais mousse à La Forge ès Landes à St. Ouën. Nou jouait au Tireli, ès Marbres, et à Muchi. À l'êcole, ch'tait au jeu des Barres et à Saute-Mouton l'pus souvent. Pour eune volée, la Topie 'tait populaithe. Nou mèrtchait un rond atout d'la craie sus l'chînment ou atout tchiquechose pointu dans l'bel, et nou viait la ficelle lé tou d'la topie pour la faithe topinner dans l'rond. L'autre êprouvait à la taper hors du rond atout la sienne, et s'i' pouvait l'faithe sans qu'sa topie tchittîsse à topinner dans l'rond auprès aver tapé l'autre, i' 'tait l'gangnant!

Au sé, i' n'y avait pon d'radio ni d'télévision pour sé passer l'temps. Nou s'assiévait au pid d'l'âtre auve papa et manman. Papa alleunmait sa pipe et manman sé m'ttait à ouvrer ou à couôtre. Lé tchian s'couochait sus la natte en d'vant du feu, et la catte ronronnait ou dormillonnait trantchil'ment à la cârre dé l'âtre. J'mé r'souveins d'aver veu l'crasset alleunmé siez man grand-grand-pèthe Jean Thomas au Ménage ès Feuvres, mais ch'tait des lampes à paraffine qué j'avions siez papa.

Les jannes d'à ch't heu pourraient craithe tch'i' d'vait enn'yer ès jannes dé chu temps-là. Mais nou-fait dgia! Les séthées 'taient întérêssantes. Dans l'hiver, quand il' 'taient longues, j'aimais bein vaie m'n oncl'ye Charles arriver atout sa lantérne tch'avait dés f'nêtres dé corne, ses braies d'bâthîn à pliatchet, sa c'mînse dé molleton et san chapé d'feûtre amathé l'tou d'san co atout un but d'ficelle. Les gens, en général, né vivaient pon si vièrs comme dé nouos jours, ouaîthe tch'i' y'en avait tréjous tchitchuns tchi touchaient la nénantaine, mais i' pathaîssaient vièrs viyant tch'i' gardaient lus barbes, et papa et m'n oncl'ye Charles en' 'taient du nombre. Dans chu temps-là il' appréchaient d'la souoxantaine, mais nou lus en éthait donné huiptante à les vaie aujourd'aniet.

Il' avaient navidgi touos les deux, et avaient 'té à La Côte et à Tèrreneuve. Lus convêrsation 'tait tréjous d'la vie en mé, d'lus aventuthes à bord des navithes (à vailes dans chu temps-là!), d's anmîns pèrdus dans les naufrages et d'la vie sus les runs des Robins, Fruïngs et Boutillièrs à La Côte. I' pouvaient vouos dithe combein d'jours qué les grands navithes - lé Patruus, lé C.R.C., la Fanny Breslauer, lé Dawn, etc - avaient prîns à crouaîsi d'la cauchie en ville à Paspédgia, et i' connaîssaient l'caractaithe dé touos les cap'taines et la générosité ou l'avarice des bourgeais. Combein d'fais qu'j'ai ouï papa dithe qué quand les navithes avaient d'mauvais temps et d'vents contraithes au large en c'mîn pour Tèrreneuve ou La Côte dans l'hiver, et qué l'viage duthait bein pus longtemps qu' d'habitude, i' v'naient a court dé mangi et qu'les morcieaux d'lard dans l'fond du saleux y'avaient 'té si longtemps qu'y avait des magots d'dans! Ch'tait fascinnant d'les ouï et nou s'assiévait trantchil'ment à l's êcouter. À ch't êpoque-là les mousses savaient bein qué ch'tait malpoli d'înterrompre la convêrsation d's anciens! Papa avait 'té naufragi eune fais. San navithe, les mâts abbatus, fut êchoué l'long d'la côte d'Irlande et, auve ses compangnons d'naufrage, i' restit parmi l's Irlandais pour eune bouanne volée dévant qu'un aut' navithe vînsse les ramâsser. L's Irlandais fûdrent hospitalyièrs, mais il' 'taient pauvres et vivaient hardi sus des patates.

Quand j'tions touos seurs au sé, papa m'racontait d's histouaithes. Eune séthée, quand man frèthe Franço 'tait auve nous, il 'tait à nouos pâler d'L'Afrique quand i' mentionnit qué ch'tait là tch'i' y'avait d's ouaîsieaux tchi pâlent. Jé n'pouvions pon en r'vénîn, l'Franco et mé, d'ouï qu'un ouaîsé pouvait pâler! Ch'est vrai, pourtant! papa nouos dît, Nou l's appellent des Pèrrots! Et s'ou-s êt' bouans garçons j'vouos emmén'nait à en vaie iun!

I' faut penser qué j'feunmes bouans garçons, car eune séthée nouos v'la aller auve papa siez un Mess Hamon, l'cordonyi, d'tchiquebord du côté d'La Ville Bagot. En nouos en allant, Franço nouos dit tch'i' s'en allait d'mander des tchestchions au pèrrot entouorre L'Afrique viyant tch'il avait veu l'jour là-bas! Arrivés à la cordon'nie, nouos v'la mâtés comme des êmânues en d'vant du pèrrot. I' nouos r'gardait d'un yi d'travers. J'pense bein tch'i' nouos pranait pour des drôles dé pèrrots étout! Enfîn : Né v'la l'Franço à l'tchestionner entouorre L'Afrique, mais à nouot' grand' surprînse i' n'lé rêponnait pon, et, dêgouôtés, j'lî touannînmes lé dos pour nouos en aller quand lé v'la à crier à tue-tête souotre nous! Nouos r'véla întérêssis et j'nouos rappréchînmes dé la cage pour qué Franço li r'démandîsse des tchestchions, mais i' nouos r'gardait d'un mauvais yi sans vouler rêpondre! Quand la scène s'était répétée deux-s'trais fais j'pêrdînmes espéthance d'apprendre autcheune chose entouorre L'Afrique, et papa nouos r'consolit en nouos disant qué ch'tait probabl'yement viyant qué l'pèrrot né savait qu'la langue Afritchaine tch'i' n'avait pon comprîns nouos tchestchions.

Ou-s êthez p't êt' pus d'chance quand il étha apprîns l'Jèrriais! I' nouos dit!

George d'La Forge
 

Viyiz étout:

 

Les Pages Jèrriaises