San Antonio, Texas,
U.S.A.
Lé 13 janvyi, 1973.
Moussieu l'Rédacteu,
"Oulle est bouanne à mathier, pourtant!", Manman disait à Papa eune séthée quand j'tais mousse et qué j'tions assis au pid du feu.
"Tch'est tch'est bouanne à mathier?", Papa li d'mandit.
"Bon!" T'èrvélà à hoûter la maîntchi du temps quand j'sis à t'pâler," Manman li dit. "Y'a dgiex munnutes qué j'sis à t'pâler d'la fille à Moussieu du Frèsne, et tu n'm'as mème pon ouie!"
"Eh bein, Ann," Papa li dit, "J'ai ieu un fort jour dans la forge aniet et j'sis si lâssé qu'j'avais accliâssé sans m'en apèrchéver. Mais tch'est tch'en est d'chutte janne fille-là? J'la vis à l'églyise l'aut' Dînmanche. Ou m'frappit comme étant hardi belle."
"Véthe," Manman li dit, "et oulle est aussi charmante comme oulle est belle. Ou n'a pon bésoin d'êt' attîntée dans touos ses falbalas pour sé faithe èrconnaitre comme la fille dé gens d'bein. J'ai ouï qu'ch'est viyant qu'sa m'mèe n'trouve pon autcheun janne homme bouan assez pour lyi qu'ou n'est pon mathiée.
"La bouannefemme Missis Lesbithé, tchi va laver siez ieux, m'disait l'aut' jour," continnuit Manman, "qué Madanme du Fresne lî dit qu'oulle avait un janne homme en veue pour sa fille, mais qué s'n homme n'en 'tait pon d'avis. La drôle dé chose est tch'i' voudrait un fèrmyi pour bieau-fis, car i' dit qu'ch'est la vie la pus naturelle pour un homme et tch'il a tréjous r'gretté d'aver ieu à pâsser sa vie dans eune office li-mème pour continnuer l'conmèrce fondé par san p'pèe."
"Jé n'sai tchi janne homme qué la m'mèe a en veue?" Papa dit à Manman.
"J'pense qué ch'est Raulîn des Caudeville," Manman li dît.
"Bon!", s'fit Papa, "ch'est justément comme eune femme d'êt' êprînse d'un gas viyant tch'il est bieau garçon et d'bouanne fanmile, mais jé l'connais bein, et il est bête comme eune ouaie tchi coue sus des pièrres. Si j'avions eune fille à mathier, j'n'êprouvethais pon à attriotchi un âmice comme ch'tî-là siez nous!"
"Pourtant, j'l'aime bein, mé!", s'fit Manman. "Jé l'vis en ville la s'maine pâssée et i' m'fit un bieau salut. J'voudrais qu'tu'éthais veu la manniéthe tch'i' halit san chapé quand i' m'vit. Et i' m'appelit 'Madanme', étout!"
"Eh bein, nouos y v'là!", Papa li dit. "Ch'est vrai qu'tut pathais comme eune danme quand tu t'habile pour aller en ville, mais i' n'faut pon s'laîssi êt' êprîns par les bieaux-bieaux et sifèches dé ch't êmânue-là. I' n'a janmais fait un coup d'travas. San p'pèe est l'Président d'eune banque. Y'a ieu tant d'banqueroutes qué nou n'sait janmais quand tch'est'che qué la préchaine s'en va nouos tchaie sus l'co. Si ch'la s'arrivait siez li, tch'est qu'chu garçon-là f'thait pour gângni sa vie?"
"Mais i' n'est pon l'seul janne homme qué la m'mée a dans l'idée," s'fit Manman. "I' pathaît qu'oulle a învité Nicolas B'lîn d'La Tann'nie, à L'Êta (i' loue La Tann'nie des d'scendants d'la fanmile Le Cras), à baithe du thée eune fais ou deux. Ch'est seux tch'i' y'a des sou-là. Mais la bouannefemme Missis Lesbithé m'dît qu'Mad'mouaîselle du Fresne n'en veurt rein, dé ch'tî-là. Ou n'aime pon s'n appathence. Ch'est vrai tch'i' n'a pon fort d'attrait pour eune janne fille. Il est si maigre qué nou dithait tch'il a l'ventre cliuté au dos, et i' pathaît qu'ouaithe tch'il a du bein il est si avârre tch'i'i' quartell'lait un liard en quatre!
"Et pis y'a l'fis à Cap'taine Bêchèrvaise. Lé bouanhomme Cap'taine fît forteune dans les pays cauds quand i' navidgeait, et d'pis tch'i' n'est pus, l'fis a acaté eune fèrme à L'Êtotchet. Malheutheusement, i' ouait haut comme eune chouque et il est oblyigi dé s'fier hardi sus sa m'mèe pour souangni d'ses affaithes. mais i' travâle comme un j'va et il est à faithe bein. L'embête est qu'sa méthe a eune langue d'aspi, et Madanme du Fresne né l'veurt pon comme bieau-fis. Oulle a peux qu'sa fille es'sait malheutheuse auve eune belle-méthe dé mème souos les pids à londgieu d'jours, et nou n'peut pon la bliaûmer pour autant."
"Eh bein," Papa dît à Manman, "ses pathents peuvent penser à ch'tî-chîn ou ch'tî-là, mais j'sis d'avis qu'en fîn d'compte tu vèrras qué la d'mouaîselle f'tha san chouaix lyi-mème. Tch'il aie des dents comme des madelles dé hêche, ou des gambes vèrques ou l'nez crotchi, s'ou d'veint enamouothachie d'tchique janne homme ché s'sa ch'tî-là qu'ou voudra et qu'ou finnitha par mathier!"
"J'pense bein qu'tu'as raison," Manman li dit. "Enfîn, i' faut prandre lé temps comme lé Bouan Dgieu nouos l'donne. Espéthons qu'ch'en s'sa iun tchi li'apportétha bonheu. Quand nou veint à considéther les choses, ch'est la santé l'bonheu et l'contentement tchi sont l'prîncipa dans la vie sus chutte tèrre. Mais né v'là l'heuthe tch'avanche. Met l'cidre à caûffer et j'éthons eune bollée d'chaudé d'vant nouos couochi!"
George d'La Forge
Viyiz étout: