En r'gardant l'portrait d'Moussieu Tomes et sa fanmil'ye dans la gâzette du 30 janvyi, qué j'veins d'èrchéver, i' m'veint à l'idée tch'il est temps qué j'lé félicite à l'occâsion dé s'n assèrmentâtion comme nouot' nouvieau Protchuleux, un poste dé grande împortance en d'dans et en d'houors dé la Cour Rouoyale viyant tch'il est l'Papa d'la Police Honorifique dé l'Île. Eh bein, à m'n idée, ou n'peut pon en aver un pus charmant, et ch'est seux qu' ch'est un pliaîsi pour ses membres dé l'consulter au bésoin.
Et l'portrait d'la fache riante dé l'Avocat et Sénateu Ralph Vibert, nouvieau Président du Conmité d'Etablyissement, m'fait penser qué s'i' n'avait pon résingni quand il 'tait Avocat Général, i' s'sait probabliément Bailli d'l'Île à ch't heu, et il en éthait fait un raide bouan! J'aime tréjous r'garder les portraits dans la gâzette. Quand nou-s-est à l'êtrangi et qu nou vait les portraits d'mème, v'la tchi vouos rapprèche un mio d'l'Île. Lé chein du Juge W. E. de Faye est mangnifique étout. I' pathaît acouo si janne qué nou n'dithait pon à l'vaie tch'i y'a déjà chînquante tch'il est Avocat! Et dans san portrait l'Sénateu John Le Mèrquand pathaît détèrminné. Il est à faithe du bouan travas en prannant l'initiative pour arrangi qu' les Présidents d'Conmités lus rêunissent.
À ch't heu, i' faut qué j'saute du coq à l'âne. Lé portrait des pouorres bêtes à saie dans l'pité d'un clios à Ste. Mathie est pitchabl'ye. J'espéthe qué l'Sénateu J. J. L'Mèrquand, champion des drouaits d'l'homme et d's annimaux, s'en va pouver faithe tchiquechose pour les soulagi. J'viyais tch'il 'tait en train d'entanmer l'affaithe dans L's Êtats.
Vouot' articl'ye d'fond, Moussieu l'Rédacteu, au sujet d'couoyer l'ûsage de la pétrole, est pliein d'bouan sens, mais si l'exempl'ye en Améthique veurt dithe autcheune chose, l'idée d'couoyer volontaithement n'vaut pon grand' chose. Tchitchuns lé f'thont, mais la grand' mâjorité n'aiment pon à s'dêrangi. L'expéthience ichîn est tch'i' faut la louai pour faithe les gens couoyer. J'vai des mousses à londgieu d'jours à galvauder partout sus des motocyclettes quand i' n'sont pon à l'êcole, un vrais ûsage innutile dé pétrole, et les pathents né l's arrêtent pon. Et les mousses dé 16 ans font mème sèrvi des grands motos pour aller deux pas à l'êcole. À ch't heu, y'a tchestchion d'râtionner.
J'vai qu' les membres d'La Société Jèrriaise à Londres 'tait pour sé régaler auve d'la soupe d'andgule à l'occâsion d'lus rêunion du sept févri. Est-ch' qué l'Député P. M. de Veulle allit lus en faithe? Il est fanmeux à la faithe, la soupe d'andgule, et l'ieau m'veint dans la bouoche quand j'pense ès bollées qu' j'ai mangi siez li!
Ch'est intérêssant d'liéthe dans la gâzette tch'i' y'a sept chents louages illégalement otchupés dans l'Île. Ch'est danmage dé vaie d'ité quand y'a tant d'Jèrrais tch'attendent pour êt louogis. Jé suppose qué ch'est pûtôt dans les concentrâtions d'maîsons, l's “Estates” comme i' sont appelées. Si ch'tait dans les campangnes, les Connêtabl'yes lé séthaient, car i' sont au couothant d'chein tchi s'pâsse dans lus pâraisses.
Quand nou veint à cartchuler l's affaithes, i' n'y a pon d'doute qué nouot' système dé Connêtabl'ye et police honorifique dé châque pâraisse est l'idéal. I' connaîssent lus parouaîssiens et les parouaîssiens les connaîssent, et v'la tchi fait eune combinnaîson tchi fonctionne bein - ch'est à dithe qué ch'tait d'mème quand Jèrri 'tait otchupé par des Jèrriais. À ch't heu, y'a tant d'Angliais et d'êtrangièrs dans l'Île qué j'mé d'mande si touos l's habitants d'pâraisses sont connus par lus Connêtabl'yes.
Dans san discours au diner annuel dé la Municipalité à St. Pièrre, lé Protchuleux Tomes explyitchit la nouvelle louai sus la police et pâlit du nouvieau rôle dé la Police Honorifique vis-à-vis d'la Police salariée. J'espéthe tch'i' y'étha tréjous eune bouanne rélâtion entre les deux et tch'i' s'en vont continnuer à travailli bein ensembl'ye pour lé bein d'l'Île tch'a pus bésoin qu' janmais d'eune police nombreuse et sévéthe pour raptichi l'nombre d'malfaiteurs tch'ont forchi la Cour dé Police Correctionnelle dé faithe sèrvi deux Juges. Et avec la neuve prison, acouo pus d'jannes tch'aiment mus voler et faithe mêché qué d'travailli s'en vont vouler y d'meuther et êt' couochis et nouôrris ès frais d'l'Île!
George d'La Forge
Viyiz étout: