Dans les souoxante membres lus réunîtent à la Salle Pârouaissiale dé Ste. Mathie pour rencontrer les char-à-bancs pour la touônnée du jeudi, lé 24 dé juillet. Lé parti sortit dans les 2 heuthes et d'mie par Bouonne Niet, la côte du Nord pour Rôzé, et un p'tit arrêt au brise-lames à Ste. Cath'rine pour eune glace. Auprès jusqu'à Gouôrray et à travers les pâraisses pour sé trouver au Haut d'Tombette pour eune tâssée d'thée et vaie les belles flieurs et l's alentours.
D'ichîn par La Route du Nord, ava Le Mourier pour sé trouver sus Les Monts à St. Ouën où'est qu'un p'tit arrêt fut fait et les siens tchi voulaient pouvaient faithe eune p'tite promenade. Auprès, en route pour l'Aéroport et lé r'pas du sé.
Dans les 128 membres lus assiévîtent pour lé r'pas, qui fut hardi bein sèrvi: preunmiéthement d'la soupe ou bein oeuf mayonnaise, un rôti auve toutes sortes dé lédgeunmes et pis du “trifle” ou bein du pâté d'pommes, et café.
Auprès lé r'pas les affaithes eûtent lieu: preunmiéthement, lé Président d'mandit ès membres dé lus l'ver et obsèrver eune minute dé silence en mémouaithe du Sénateu J. J. Le Marquand.
Lé rapport du mais d'mai au Fort et du sèrvice annuel fut liu et accepté. Plusieurs nouvieaux membres fûtent êlus et la correspondance fut liue.
La restant d'la séthée 'tait dans les mains dé Mde. M. J. de la Haye et lé Conmité Dramatique. Y'eut plusieurs chansons et tchiques danses, auvec Mde. Carter à l'accordéon et Mde. Le Sueur à l'orgue pour les chansons. La séthée s'pâssit bein trop vite et Mde. de la Haye fit les r'mèrciements à tous concèrnés qu'avaient aîdgi à faithe la journée un si grand succès. Lé Président, d'la part dé tous, r'mèrcyit lé Conmité Dramatique pour lus êffort.
1975
Viyiz étout: