Les bouais russellent douochement dans chutte brîsette
D'Êté tchi caûffe lé méta et la chai.
Lé solé liet châque page, vèrte, vive et s'grète,
Fielletée par chu vent dans les bras des bouais.
Les d'grés sont cauds. Ch'est ichîn qu'j'sis assis.
J'êcris mes vèrsets vièddes tchi n'sont pon s'grets,
Clyînn'tant auve la bliancheu dé chu papi.
Lé ciel est bliu, les fielles sont vèrtes, et mé,
J'sis nièrchi par mes s'grets. La véthité
Lav'tha mes mots. La brîsette souffliétha
Lé paids des ombres dé d'ssus mes nièrs vèrsets.
Mèrtchis sus l'blianc par la chai et l'méta,
Ches mots sont êcliaithis par lé solé,
Lius par ses rayons, emportés par l'vent.
Mais l'papi restétha blianc coumme du fé,
Les bouais et lus s'grets restéthont vivants.
Geraint Jennings
Août 2000
|
